Hri kai leh dam awm belh zel

Nimin khan Serchhip District-a COVID-19 hri kai mi 30 hmuh belh leh niin hri kai mi 18 te enkawl dam an ni thung.

Nimin-a Serchhip District-a hri kai hmuhchhuah mi 30 zinga 14 te hi New Serchhip-a hri kai hmuh te niin Vengchung, Chanmari Veng leh Chhingchhip-ah hri kai hmuh belh an awm bawk.

Inrinni khan Serchhip District-ah hri kai mi 78 zet hmuhchhuah an ni a, TrueNat Laboratory atangin COVID-19 hri kai mi pathum hmuh niin East Lungdar khua mi 2 leh Serchhip Venglai-a mi pakhat te an ni a. Fluorescent Immunoassay Test hmangin hri kai mi pakhat hmuh ni bawkin BSF mi leh sa, tunhnaia State pawn atanga rawn lut a ni thung. Rapid Antigen Test hmangin hri kai mi 75 zet hmuh an ni a, an zinga mi 22 te chu Keitum khua ami niin New Ser-chhip-ah 17, Chhingchhip-ah mi 8, Chhiahtlang-ah 7, Thenzawl-ah 6, Bazar Veng, Ramthlun Veng leh Vengchung-ah mi 3 theuh, IOC Veng-ah mi 2 leh Chanmari Veng, Chhim Veng, Dinthar Veng leh Saron Veng-ah mi pakhat theuh te an ni.

Serchhip District-a hri kai enkawl te zingah nimin khan mi 18 te chu anmahni enkawlna hmun atanga chhuahtir an ni ve leh bawk a, heti hian nimin tlai thlenga Serchhip District-a hri kai hmuhchhuah chu 3358 ni tawhin an zinga 2631 te chu enkawl dam an ni tawh a, tunah hian hri kai enkawllai 720 la awmin hri kai te zingah mi 7 an boral tawh bawk a ni.