Chanchin thar thenkhat :

Raltlan rawn luh belh zel

Myanmar ram buaina avanga Mizoram-a raltlan rawn lut chu an la pung chho zel a, nimin thleng khan Hnahthial District-a raltlan rawn lut chu 2,235 an tling tawh a, heng mite hi chhungkaw 390 ami te an ni tih Hnahthial DC Office chhin-chhiahna ah tarlan a ni. Hnahthial District-a ral-tlan rawn lut te hi khaw 11-ah awm mekin Thing-sai khua ah mi 900 an awm mek a ni. Hetihlai hian raltlan rawn lut tamna ber East Tuipui bial chhungah chuan nimin thleng khan khaw 21-ah raltlan 2625 an awm mek bawk a, Farkawn-ah tam berin 1050 an awm mek bawk a ni. Myan-mar buaina hian ziaawm lam la pan lovin sipai leh tualchhung mi hi an la in kap reng a ni.

Sesawng-ah Broadband hawng

Sawrkar Laipui Department of Telecommunication hnuaia Bharat Broadband Network Limited chuan Azadi ka Amrit Mahotsav kal zelah Inrinni khan Sesawng khuaah Broadband Connectivity an hawng a, Sesawng khaw tana Broadband Connectivity hi Bharat Net Phase-II Project, Department of Telecommunications atanga pek a ni a. He project kaltlang hian Mizo-ram-a khaw hrang hrang 762 hnenah Broadband pek tum niin khaw 241-ah chuan hmanraw engkim dah fel a ni tawh a, hman mai theih tura commission hmabak a ni.

SEDP-ah hma la thei dawn

Tunhnaia Tuirial bial-a zin Health Minister Dr. R. Lalthangliana chuan SEDP chungchang sawiin, Budget hmasaa SEDP an dah chu beisei lawk hauh loh Covid-ah hman a ngai tih a sawi a. “Kum hnih tha hun kan la nei a, Covid hi kiam zel turah ngai ila, a lo la awm deuh a nih pawhin a hma ang em em khan pawisa hmanna tur a awm tawh lo ang a, Budget hmasaa SEDP kan dah kha chu beisei lawk hauh loh Covid-ah hman a ngai a, Budget tharah hi chuan kan Chief Minister zahawm takte nen pawh kan sawi tawh a, pawisa kan dah ang a, hma kan la thei tak tak tawh dawn a ni,” a ti.

Thu diklo a nih thu sawi

MNF Adviser Dr. R. Lalthangliana chuan Inrinni khan bye-election neihna turTuirial bial-a khaw thenkhat fangin, “Kan tlin lohna bial Serchhip-ah khan ka Department Health-ah pawh Oxygen Plan lianpui Prime Minister nen inthlunzawmin ka hawng a, Commerce-ah pawh Market lian tak an sa zo a, Department dangah pawh hma kan la mar reng tho,” tiin mi thenkhat ten 'Serchhip-ah pawh an tiam ang an ti lo' an lo tihfo hi thudiklo a ni tih a sawi a. An Party Candidate an Vote chuan an zawngchhang tur thu a sawi bawk.

NHM Nurse ngaihsak lo?

ZPM Thalaite chuan National Health Mission (NHM) hnuaia thawk Nurse tanglai mek te chu sawrkar in a ngaihsak tawklo nia a lan thu thuchhuah siama tarlangin, an dinhmun chhiat zia leh mangan thlakzia pawh vawi duai lo Health Minister leh Chief Minister hnenah an lo thlen tawh thin niin an sawi a. Chuti chunga sawrkar lakah thu lawmawm engmah an la dawng chunglo chu pawi an tih thu an sawi bawk. Tunah hian NHM hnuaiah hian Nurse tanglai hi Mizoram-ah 300 chuang an awm niin an sawi.