Latest News

Chanchin thar thenkhat :

Vawk hri leng sawiho

State Disaster Management Authority (SD-MA) thutkhawm chu nimin khan Chief Minister Zoramthanga hovin CM Conference Hall-ah neih a ni a. He hunah hian Mizorama African Swine Fever (ASF) leng mek chungchang leh hmalak dan tur sawiho niin kumin March ni 21 atang khan he hri hi a leng tan nia hriat niin, October ni 4 thleng khan Mizoram District 11-a chhungkaw 8987 nghawng tawhin, Vawk 33,000 chuang an thih tawh thu report a ni a, Vawk suat tawh chu 10,340 a ni. ASF natna hi mihring tan hlauhawm loh mahse Vawk in an inkaihdarh hma em avangin a kai tawh chuan Vawk danga an thehdarh loh nan suat thin a ni a. Meeting hian he hrileng avanga harsatna te chhawk zangkhai a nih theih nan chak taka sawrkar laipuiah bawhzui turin an rel a ni.

SDMA hian State Disaster Mitigation Fund hman dan tur chungchanga rawtna an thlen chu pawmsak in, cheng nuai 25 aia tlem Work Proposal chu phalna pek a ni bawk.


Speaker in tlangzarh

Mizoram Legislative Assembly Speaker Lalrinliana Sailo chuan ‘Electoral Politics in Mizo-ram (1972-2019)’ tih lehkhabu, Dr. Joseph C. Lalremruata, Mamit College Assistant Professor ziak chu nimin khan Assembly Secretariat Common Recess Room-ah a tlangzarh a, he hunah hian Speaker chuan Political Science lama mi thiam in Zofate tana ro hlu la ni tur, zirlaite chhawr tangkai theih tur leh zirbingna kalpui duh te tan pawha chhenfakawm, lehkhabu rotling a ziak chu lawmawm a tih thu a sawi a ni.


Mizoram rawn zirchiang dawn

Mizoram-a COVID-19 hripui darh mek zirchiang tura sawrkar laipuiin a rawn tirh, Multi Disciplinary Covid-19 Study Team chuan nimin khan Mizoram rawn thlengin nimin vek khan State sawrkar-a mi pawimawh te an kawm nghal a, Vawiin lam hian District hrang hrang CMO te kawmin hemi hnu hian Aizawl-a hri kai enkawlna hmun an tlawh bawk ang.


MPF in ZPM te an kawm

MPF General Hqrs. hruaitute chu nimin khan Aizawl-a ZPM Office-ah lengin Tuirial Bial-a Assembly bye-election neih tura thawhho dan tur chungchangah inkawmna an nei a, he hunah hian MPF hruaitute chuan kan ram siam tha turin Sawrkar, NGO leh Kohhrante kan zavaia kan thawhho a ngai tih sawiin, “Thuthlung bawhchhia-a in puan mualpho ngai lo leh theihtawp chhuah turin kan in ngen a ni,” an ti. He hunah hian ZPM hruaitu ten an lo dawngsawng a ni.


MPCC in mipui thlavang hauh

Mizoram Pradesh Congress Committee (MPCC) chuan MNF sawrkarin COVID-19 hripui a do dan dik lo avanga mipui thlavang hauhna hun nimin khan Aizawl-a Vanapa Hall kawt-ah an hmang a, he hun tel te hian resolution pass in COVID-19 dona Sawrkar hlawh-chham chhan Dr. R. Lalthangliana, Health Minister bang turin an phut a, Chief Minister pawh dinhmun chhe zawk an din hma in ban vat turin an ngen tih an tarlang bawk.


Nupui then tawh thihchilh

Lunglei Electric Veng-a cheng Tlangthiang-hlimi (61) chu nimin chhunlai vel khan Lunglei-a HPC Office bula chawhmeh a zawrh laiin a pasal then tawh Rohmingliana (61) chuan Gelatin bomb hmangin a thihchilh. Thudawn danin heng mite hi nupa ni thinin fa pawh pahnih an nei tawh a, Lalthianghlimi fanu a bul chiaha chawhmeh zuar in a sawi danin,  Rohmingliana hian  Thianghlimi hnenah a awm a nuam lovin a khua a sik deuh tih sawi pahin a bawh a, hetah hian bomb hi a puak zui ta a ni.

He thil thlen hnu hian an pahnih hian Lung-lei Civil Hospital panpui nghal an ni a, amaherawh chu chhan hman an ni ta lo a ni. Police te chuan he thil thlenna hmun hi an thleng nghal a, an ruang pawh Postmortem nghal niin an ruang hi Thiltlang ah vui tura ruahman a ni. Thudawn danin heng mi pahnih te hi an inthen hnu hian an pa hian haw turin a ko thin a, amaherawh chu an nu hi a haw duh lo a ni.

Comments

Popular News (Last 30 Days)