ZLP Leader-ah Lalduhoma

ZPM Ticket-a Serchhip bialtu MLA atana thlantlin Lalduhoma chu Mizoram Assembly House-ah Zo Peoples Movement Legislature Party (ZLP) zawm phalsak niin ZLP Leader atan dah nghal a ni.

Serchhip bial MLA bye-election neih dawna ZLP Member ten an lo sawi tawh angin Lalduhoma hi Serchhip bialtu MLA atana thlantlin a nih hnuah an party remtihna in August, 17 khan Assembly Speaker Lalrinliana Sailo hnenah ZPM Legislature Party zawm dilna hi a thehlut a, hei hi Speaker chuan a phalsak a, Assembly Speaker Lalrinliana Sailo chuan, “Speaker thuneihnaah chuan Legislature Party dang zawm remtih loh theih a ni. Mahse, a dilna lo hnâwlsak hi tul ka ti lo a, ka pawmsak a ni,” a ti.

Hetianga ZLP zawm a dilna phalsak a nih hnu hian ZLP hruaitu insiamrem an dilna pawh phalsak niin Serchhip bialtu MLA Lalduhoma chu ZPM Legislature Party leader thar a ni a. Aizawl North-I bialtu MLA Vanlalhlana chu Deputy Leader niin, Aizawl North-II bialtu Dr. Vanlalthlana chu Secretary a ni bawk.

Kum 2018 MLA inthlanpui-a Independent MLA atana thlantlin mi 7 te chuan a tirah ZPM Legislature Party an din a, hei hi Speaker in a remtih zui loh avangin Zo Peoples Movement Legislature Party (ZLP) an din leh a, Lalduhoma hi ZLP-ah Leader ni thinin MLA atanga ban tir a nih hnuah Vanlalhlana chu Leader a ni leh a. Serchhip Bial atanga ZPM Ticket-a Lalduhoma thlantlin a nih leh hnuah an Party hian ZPM Legislature Party dinin Independent-a thlantlin te hian thlawp se an duh zawk laiin Legislature Party din tur hian member pakhat aia tam awm a tul avangin ZPM Party chuan Legislature Party an la din thei ta rihlo thung a ni.