Latest News

Chanchin thar thenkhat :

Anganwadi cheitha dawn

Nimin khan Lunglei-ah District Bawrhsap Kulothungan A hovin CSR kaltlanga Lunglei District-a Anganwadi Centre thlanchhuah te chei that dan tur sawiho a ni a. He hmalakna atan hian Central Warehousing Corporation, Gu-wahati atangin CSR Fund cheng nuai 6.50 dawn niin Anganwadi Centre thlanchhuah panga (Rahsi Veng-I, Bazar-III, Pukpui-I&II leh Lungpuizawl-II) te chu ‘BALA Anganwadi Centre’ atan chei that tum an ni a. BALA (Building as Learning Aid) Anganwadi Centre hnuaiah hian Anganwadi Centre thlanchhuah ah te naupangte zirna kawnga puitu (learning aid) hrang hrang ruahman sak tur niin a building-ah hian lemziak thiam ten naupang hriat tur pawimawh hrang hrang an ziah dawn bakah thlai chinna hmun (vegetable garden) te ruahman a ni anga. He hmalakna hi Thenzawl-ah pawh kalpui a lo ni tawh a ni.


Mikhual tan thlen theih ta

Disaster Management & Rehabilitation Department in thuchhuah siama a lo phal tawh angin Mizoram chhunga Accommodation Unit zawng zawng te chu mipui tana thlen theih tura hawn vek a nih thu nimin khan Tourism Director chuan hriattirna tichhuakin a tarlang a, Accommodation Unit hian Hotel, Homestay/Bed & Breakfast, Tourist Lodge te a huam a. Restaurant erawh pawnlam mi tan dawr phal a ni lo thung. Thenzawl-a Golf Course chu Cottage a thleng turte tan hawn a ni anga, tlawh tur hrim hrim atan chuan hawn a la ni lo thung ang.


Mi 4 thihna chhuichiang dawn

August 27, 2021-a Kolasib Diakkawn a mi 4 te Tuizem-a an thihna chungchang a tul anga chhui chiang turin Kolasib District Bawrhsap chuan Magisterial Inquiry a din a, he Magisterial Inquiry-ah hian Timothy R. Lalhmangaiha BDO Bilkhawthlir bakah Dr. Engkunga Chhangte, Executive Magistrate leh Dr. HC. Lalnunhlua, Medical Officer te telin ni 7 chhunga report thehlut tura tih an ni.


Khawzawl inkhuahkhirh rel

Nimin-a Khawzawl District Disaster Management Authority thukhawm chuan tunhnaiah Khawzawl District, a bikin Khawzawl khawchhung ah COVID-19 hri kai an pun chak avangin inkhuah-khirhna khauh zawk kalpui an rel a, hemi ang hian nizan dar 7:00 atang khan Khawzawl Town chu Restricted Area-ah puan niin hemi hun chhung hian dinhmun chiang zawk hriat a nih theih nan Mass Testing kalpui turin an rel bawk. Restricted Area huamchhungah hian chhiat tawhna leh Medical Emergency tihloh ah chuan mahni In compound chhuahsan phal a ni lova, dawr inhawn phal ni lovin mahni compound pawn lama hnathawh pawh phal a ni lo bawk.

Comments

Chhiar Hlawhte