Latest News

Nursing School CCC-a hri kai enkawl lai chetsual palhna avangin a boral

Serchhip Nursing School CCC-a COVID-19 hri kai enkawllai F. Lalneihkima, Serchhip Chhim Veng chu nimin khan boralin nimin vek khan vuiliam nghal a ni.


Kum 60-a upa F. Lalneihkima s/o F. Lalhluna, Serchhip Chhim Veng hian September 10, 2021 khan COVID-19 hri a kai tih hmuhchhuah a nih avangin a nupui leh a farnu te nen Nursing School CCC-ah hian enkawl tura dah an ni a, nimin zing khan Nursing School Building hnunglam-ah a ruang hi hmuh niin Nursing School enkawltu ten an enfiah hnuah Serchhip Police te hriattir an ni a, anni hian an enfiah hnuah nimin zing khan a ruang hi lakchhuah niin nimin vek khan vuiliam a ni.

Nursing School CCC-a thawktute chuan F. Lalneihkima hi Nursing School CCC chawng thum-a a chhawng hnuai bera enkawl a ni tih an sawi a, CCC-a dahluh a nih hnu hian taksa lama harsatna bik a neih emaw hriat a ni lo tih sawiin, a chetsual dan tak pawh an hriat loh thu leh a chesual lai hmu an awmloh thu an sawi a. Amah hi taksa chaklohna nei te a nih avangin a hma ni pawh hian Drip te khai sak a nih thu an sawi bawk.

Serchhip Police hotute chuan F. Lalneihkima ruang an hmuhna hi ama room atanga hnuailam ft. 15 vel ah a nih thu sawiin, a taksa hmuh mai theih ah hliam emaw hmuh tur a awmlo tih an sawi a, a ruang an hmuhna hi building bul mai a nih avangin sang tak, building chunglam atanga tla leh chesual nia a lan loh thu an sawi a. SOP hman mek ah COVID-19 hri kai enkawlna hmuna awm mek te ruang hi Postmortem ngai lo tih a nih avangin Postmortem lova vui tur a nih thu an sawi bawk.

Heti hian Serchhip District-a COVID-19 hri kai hmuhchhuah te zingah mi 4 an boral ta a, nimin-a boral hi Serchhip bika hri kai te zinga boral hmasa ber ni mah se a thih chhan hi COVID-19 a ni lo tih Health Department chuan sawiin, Covid vanga thi ah chhiar tel a nih loh thu an sawi bawk a ni.

Comments

Chhiar Hlawhte