Latest News

SerchhipDistrict-ah Hri kai enkawllai 366 la awm mek

Serchhip District-ah COVID-19 hri kai hmuh-chhuah belh zel an la ni a, Inrinni khan hri kai mi 63 zet hmuhchhuah leh niin tun dinhmun ah hri kai enkawllai 366 an la awm mek.

Inrinni khan TrueNat Laboratory-ah Sample 27 enfiah niin heng atang hian hri kai mi 4 hmuh niin an zinga mi 3 te chu Serchhip Bazar Veng ami niin Serchhip Field Veng atangin hri kai mi pakhat hmuh a ni.

Rapid Antigen Test hmanga Sample 169 enfiah atangin hri kai mi 59 hmuh ni bawkin an zinga 12 te chu Keitum khua ami te an ni a, Kram Infracon Pvt. Ltd. hnuaia thawk, Chhiah-tlang a awm te zingah hri kai mi 12 hmuh niin Serchhip Chhim Veng-ah hri kai mi 11 hmuh an ni bawk. Heng bakah hian Serchhip Bazar Veng-ah hri kai mi 5 hmuh niin Leisang Veng-ah 4, Serchhip Hmar Veng leh Ramthlun Veng-ah 3 ve ve, IOC Veng, Bilzel leh Thenzawl-ah 2 theuh leh Field Road, Kikawn leh Vengchung-ah hri kai mi pakhat theuh hmuh an ni bawk a. Nimin khan hri kai hmuhchhuah belh hi awmin an zat erawh hriatchian hman a ni lo thung.

Inrinni khan Serchhip District-a hri kai enkawl mi 10 te chu anmahni enkawlna hmun atanga chhuahtir niin heng te hi Nursing School CCC bakah 4C Marian H/S leh IAH Thenzawl a enkawl te an ni a. Nimin khan mi 10 enkawl dam leh ni bawkin Nursing School CCC atangin mi pakhat, 4C BRC East Lungdar atangin mi 5 leh IAH Thenzawl atangin mi 4 te an ni.

Heti hian nimin tlai thleng khan Serchhip District-a COVID-19 hri kai hmuh tawh chu 1416 niin an zinga 1046 te chu enkawl dam an ni tawh a, tunah hian hri kai enkawllai 366 awmin hri kai zingah accident avanga boral an awm belh avangin hri kai zingah mi 4 an boral ta bawk  a, nimin a boral hi hri vanga thi a nih loh avangin Covid vanga thi zingah erawh chhiar tel a ni lo thung.

Comments

Popular News (Last 30 Days)