Latest News

NE Chief Minister ten Agri. chungchang sawiho

India hmarchhak State-a Agriculture tihhmasawn kawnga hmalak chungchangah niminpiah khan DoNER Minister G. Kishan Reddy hovin India hmarchhak State Chief Minister-te leh an aiawhte chuan Virtual Meeting an nei.

He Meeting hi Union Minister for Agriculture and Farmers Welfare Narendra Singh Tomar chuan hmanpuiin Mizoram atang pawhin Chief Minister Zoramthanga leh Agriculture Minister C. Lalrinsanga te an tel a, sawrkar laipuia Department of Agriculture and Farmer's Welfare atanga 10% GBS tangkai thei bera hman chungchang te, Bamboo leh Oil Palm Development chungchang te, Horticulture leh Organic Farming tihhmasawn leh hmasawnna ruangam pawimawh tak takte sawiho a ni.

He hunah hian Union Minister G. Kishan Reddy chuan rualkhai zawka State te'n DoNER kaltlanga tanpuina an hmuh theih nan hmalak a tul thu leh tanrual a pawimawh thu a sawi a. Tunhnaia National Mission on Edible Oils – Oil Palm kalpui tura sawrkar laipuiin ruahmanna a siam chu a hlawhtlin theih nan India hmarchhak State-te an pawimawh thu sawiin, Mizoram chu Oil Palm chin kawngah sulhnu tha tak lo nei tawh, State dangte tan pawh entawntlak a nih thu a sawi bawk.

Chief Minister Zoramthanga pawhin hmarchhak State-te tan NEC leh DoNER a sum dah chu beitham a tih thu leh, hemi atanga State tin ten an dawn chu an mamawh hmasawnna thlen tur atan duhkhawp a tlin loh thu sawiin, ennawn tul a tih thu a thlen a. 10% GBS atanga tlangram State a hmasawnna ruhrel siam tul a tih hrang hrang a sawi bawk.

Comments

Chhiar Hlawhte