Mass Test-ah hri kai 2917 hmuhchhuah an ni tawh

Mizoram-a Veng leh khua 75-ah Sample enfiah runpui, Mass Test neih ni tawhin heng ah hian Sample 97,372 enfiah niin hri kai 2917 hmuh an ni tawh.

State Nodal Officer & Spokesperson for COVID-19 Dr. Pachuau Lalmalsawma chuan a bik taka mipui nawlpui COVID-19 Testing hi Sawrkar inhawnna leh ruahmanna fel tak bakah kil tin atanga tula hriatna avanga kalpui a ni tih sawiin, a hautakna chu awm bawk mah se a hlawkna hi Mass Testing neihna hmun apiangah hmuhchhuah a ni tih a sawi a. Tun dinhmunah AMC Area-a Veng 62 leh AMC Area pawn lama khaw 13, a vaiin Veng/khua 75-ah Sample Test runpui hi neih a ni tawh tih sawiin, heng ah hian Sample 97,372 enfiahin hri kai 2917 an hmuhchhuah tawh thu a sawi a, Test tawh zawng zawng zinga 2.99% in hri an kai thu a sawi bawk.

Dr. Pachuau Lalmalsawma chuan Mass Testing tangkaina chu heng mi 2917 te hi a hranpa a in test lemlo turte an ni ber tih sawiin, hmuhchhuah ni ta lo se hri kai nih inhre miah lovin zalen takin lo thehdarh ta se, tun ai hian kan dinhmun hi a chhe leh zual dawn a ni, a ti a. Sawrkar laipui lam atangin State tinte COVID-19 Test tam tura infuih leh ngenna dawn a ni thin a, mipui nawlpuia Test neih tamna hmunah Negative tam tak hmuhchhuah a nih thin avangin Positive rate pawhin a tlakhniam phah a; khawtlang dinhmun a tilang thin bawk tih a sawi.

Mass Testing Negative-te khuahkhirh an nih loh vanga COVID darh anga sawi a awm tih pawh sawiin Dr. Pachuau Lalmalsawma chuan, Mass Testing hi neih ni ta lo se Veng leh khaw hrang hranga Positive hmuhchhuah mi 3000 deuhthaw te hian zalen takin an thehdarh zawk ngei ang tih a sawi a. Mass Testing hi thawk leh khata Veng leh khua a COVID-19 rehna damdawi a ni kher lo tih sawiin, a ziaawmna tura hmalakna bul tanna chauh a ni tih a sawi bawk.