Latest News

Mizoram Legislative Assembly 8-na thutkhawm vawi 8-na tluang taka zawhfel a ni

Ni 3 chhung awh Mizoram Legislative Assembly 8-na thutkhawm vawi 8-na chu nimin khan tluang taka zawhfel a ni ta a, Assembly Speaker Lalrinliana Sailo chuan Member-ten ram leh hnam tana an tha leh zung senga an thawhhona chu lawmawm a tih thu a sawi.

Tunkar Thawhlehni atanga neih Assembly thutkhawm tawpni nimin khan Assembly Speaker Lalrinliana Sailo chuan Session-a tih tur hrang hrang tluang taka tluang taka zawh a ni tih sawiin, Member-ten ram leh hnam tana an tha leh zung senga an thawhhona chu lawmawm a tih thu a sawi a. COVID19 hri leng vangin member thutna siksawi a ngai a, member thenkhat hmun phuahchawp deuh hleka thut tir an ni chu hrethiam turin a ngen a. Session tlung taka a kal theih nana Department hrang hrang thawktute chungah lawmthu sawiin, Police, Health, PAD leh Assembly Secretariat-a thawktute lawmthu a hrilh hnuah nimin chhun dar 12:35 khan thutkhawm chu tiamchin awm lovin a titawp zui a ni.

Assembly Session neih zawh takah hian House-a chhan chi zawhna, Starred Question 258 dawn dawn chu a vaia pawm vek a ni a. Starred Question dawn atang hian House-a chhan turin List of Bussiness-ah zawhna 60 dah a ni a, chung zinga 9 chu House-ah chhan hman a ni a. Zawhna ziaka chhan chi, Unstarred Question 227 dawn zinga 225 pawm niin, pahnih hnawl a ni a. Hei hi a chhan chu zawhna a thui lutuk vang a ni tih Speaker chuan a sawi a. Starred Question atanga Unstarred Queation-a leh zawhna 177 a awm bawk.

Assembly thutkhawm hi Thawhlehni khan tan a ni a, thutkhawm tan a nih rual hian August ni 17-a boral Tuirial bialtu MLA, Andrew H. Thangliana leh kumin April ni 24-a COVID-19 vanga boral Minister hlui, PC. Zoram Sangliana sun an ni a, hemi hnu hian sawrkar thil pawimawh hrang hrang ngaihtuah chhunzawm a ni a, Speaker, Lalrinliana Sailo sawi danin, nimin thleng khan House-ah report 5 pharh a ni a, sawrkar lehkha pawimawh 6 pharh niin, Dan thar pakhat lo leh huan siamna atana ram inhawh tirna dan, The Mizoram Agricultural Land Leasing Bill, 2021 leh Dan awmsa siamthatna, The Mizoram Goods and Services Tax (Amendment) Bill, 2021 pawm a ni bawk.

Congress Legislature Party Leader, Thorang bialtu MLA Zodintluanga Ralte-in Special Mention hun hmangin Assam State chhunga Mizo khualzin ten harsatna an tawh thin chung-chang a sawi chhuak a. Health Minister Dr. R. Lalthangliana'n COVID-19 hri leng mek chung-changah Statement a siam bakah Financial Committee peng-a member tur thlan a ni bawk a. ZPM Legislature Party Leader, Serchhip bialtu MLA, Lalduhoma'n Motion pahnih a putluh chu pawm a ni lo thung. 

Comments

Chhiar Hlawhte