COVID-19 do hneh turin mipuiten nunphung an herrem hret hret a tul - Health Minister

Health Minister, Dr. R. Lalthangliana'n COVID-19 hri leng do hneh turin mipuiten nunphung an herrem hret hret a tul tih a sawi.

Nimin-a Assembly Session zawhna leh chhanna zawha Speaker remtihnaa COVID-19 chungchang Statement a siamah Health Minister hian, Mizoram-a Contact Tracing Team chi 3, Police, Health leh Task Force ten hri kaite an chhuina atangin chhungkua, thenawm intlawhpawh leh thian inkawmho ah hri inkaichhawnna a tam ber tih sawiin, hri leng do hneh turin nunphung her rem hret a tul a, Lockdown puan pawhin fimkhur loh chuan awmzia a awm lova, mahni leh chhungkua-a inkharkhip a, thenawm khawvengt e nen in tlawhpawh rihloh hram ni se, chutianga tan an lak chuan Pathian khawngaihna zarah rei an tih a ngaih a rin loh thu a sawi a ni. 

Dr. R. Lalthangliana chuan, an tum ber chu hri kaite rang taka hmuhchhuah zung zunga, kai ve theite vil zui a, hri kaite pawh a hun taka enkawlna pek a, nunna a tam thei ang ber chhanhim a ni tih he hunah hian sawiin, hri kai zinga nunna chan zat a tlem thei ang ber neih chu hnathawk tha leh tha lo tehfung pawimawh tak a ni a, chumi kawngah chuan Pathian khawngaihna zarah Mizoram chu an thawk tha thawkhat a, ram pumah hri kai tawh atanga thi chu zaa 1.3 a nih laiin Mizoram-ah chuan zaa 0.34 a ni a, India ram state zinga a hniam ber an ni chu a lawmawm hle a ni, a ti.

Health Minister sawi danin, Data thar berah mihring awm zat atanga Sample Test tam lamah Mizoram chu hmarchhak State zingah a titha ber a ni a, mihring awm zawng zawng zinga zaa 82.96 te sample endik a ni tawh a, hri kai hmuhchhuah a tam chhan chu hri kai te chhui zui that a nih vang a ni a, hri kai tura rinhlelh hlir sample endik a nih avangin a sang lo thei lo a, ni 35 chhungin khua leh veng 78-a Sample endik runpui neiah Sample 1,06,714 endik atangin hri kai 3,229 hmuh a ni a, hei hi za zela chhutin 3.02 niin District hrang hrangah pawh a tul anga neih mek zel a ni.

Dr. R. Lalthangliana chuan, ZMC SRHF bika hri vanga boralte zirchianna atangin hri vanga thi zingah hrisel lohna nei sa an tam hle a, nunna chan zinga 22 chu COVID-19 hri danna, Vaccine full dose la tawh an ni a, ZMC-SRHF a thi zawng zawng zinga zaa 70 vel chu vaccine la lo an ni thung a. Vaccine la tawh nunna chante pawh natna benvawn neite vek an ni a, hei hian Vaccine lak chu a him hle tih a entir a ni, a ti a. Hri leng thawh thumna thleng thei lakah inpuahchah mek a ni tih sawiin Health Minister chuan, mithiamte sawi danin hri leng thawh thumna hi naupang lamin an tuar na deuh dawna a lan avangin ZMC-ah NICU khum 10 peihfel tep niin, hei hi khum 25 thlangin tih belh theih tura ruahman niin, PICU Ward khum 10 awmna chu peihfel tep tawh a ni, a ti a. ZMC-a Doctor leh Nurse te pawh Pediatric Care pe thei tura training pek tum a ni a, Dedicated Covid Health Centre (DCHC) 13 hawng turin ruahmanna siam a ni tih sawiin, hri lengin la kiansan lo mah se, State dangte nen inkhaikhin chuan dinhmun ziaawm pawl an ni a, hei hi a chhan chu an zavaia thawhhona that vang a ni, a ti bawk.