Latest News

Mizoram atangin Jacinta Vanlalengzami hnenah National Award to Teachers hlan a ni

Serchhip District chhung North Vanlaiphai khua a A&M Grandchild School Headmistress, Jacinta Vanlalengzami chu nimin khan rampum huap-a Zirtirtu tha chawimawina, National Award to Teachers hlan a ni.

Nimin-a Zirtirtute Ni hman pualin India ram hmun hrang hranga Zirtirtu tha thlan chhuah mi 44 te hnenah National Award to Teachers hi hlan niin nikum ang bawkin kumin hian COVID-19 hri leng avangin National Award to Teachers hi New Delhi-ah hlan theih a ni lova, Video Conference hmanga hun hman chu Aizawl-a NIC Video Conference Room-ah lo zawm niin India President Ram Nath Kovind aiawhin Dr. Lalzirmawia Chhangte IAS, Secretary Schoool Education Department in Jacinta-i hi Medal leh Certificate bakah Rs. 50,000/- hlanin chawimawina dawngtu hi an service kum khat pawhsei sak thin an ni.   

National Award to Teachers hlanna hunah hian School Education Secretary Dr. Lalzirmawia Chhangte chuan khaw tinah Zirtirtu tha tak tak an awm tih sawiin, Award dawn hi an ngaihtuah loh avanga chawimawina hi dawng lo mai an nia a hriat thu a sawi a. Zirtirtute hian Award hmuhna tura tehfung chi hrang hrang hmang hian thawk se zirna atan a tha a, Award hmuh nan a tha bawk a ni, a ti a. Sawrkar school-a zirtirtute zingah Headmaster-a an kaisan dawnin duhlo an tam thin tih pawh sawiin, hei hian School tam tak chu Headmaster nei lovin a awmtir tih a sawi a, sawrkarin kaisanna a pek anga thawh hi an mawhphurhna pawimawh tak a anih thu a sawi bawk.

School Education Director James Lalrinchhana chuan kumtin zirtirtu tha te chawimawina chi thum- National Award, State Award leh District Award te hlan thin a ni tih sawiin, heng chawimawina hlu tak tak te dawng tur hian zirtirtute hian tehfung leh kalphung fel tak chi hrang hrang te an paltlang a ngai tih a sawi a, “Heng Award dawngtu te hian Village Level Committee atang hian bul an tan theuh a, uluk taka endikna te paltlang an nih avang hian an chhuanawm hle a ni,” a ti. Mizoram atanga National Award to Meritorious and Outstanding Teacher dawn hmasak ber chu kum 1965-ah khan niin Selchhunga (L), Head Teacher, Saitual Primary School in a dawng a. Nimin a National Award dawngtu Jacinta Vanlalengzami, Headmistress, A&M Grandchild School, N. Vanlaiphai, Serchhip District hi Mizoram atanga National Award dawng 76-na niin tunah hian National Award dawngtu mi 76 zingah Pension tawh 65, Boral tawh 28 leh thawk mek 11 an awm tih a sawi bawk.

Kum 2017 atang khan  National Award dawng tur thlan dan tih danglam a ni a, a hma lama kumtin mi 350 in an dawn thin chu mi 45 chauhin an dawng thei ta a. Mi 45 thlang chhuak tur hian India ram puma zirtirtu nuai 96.8 atangin mi 154 chiah chhawpchhuah theih an ni a, State atangin 126; UT atangin 10 leh Central School atangin 18 niin Mizoram aangin mi 3 rawt theih a ni a, kumin hian India ram pumah mi 154  chhawpchhuah an ni.

Comments

Popular News (Last 30 Days)