Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Inkaihhruaina la hman tur

COVID-19 avanga Mizoram-a inkharkhip kalpui mek chu tun thla ni 18 thleng pawhsei leh a ni. State Executive Committee, Mizoram State Disaster Management Authority chuan hripui darh mek dan thlirin Partial Lockdown hman mek chu kalpui chhunzawm tha a ti a, an Chairman Mizoram Chief Secretary Lalnunmawia Chuango chuan hemi chungchanga Order chu Inrinni khan tichhuakin, Sept. 4 thlenga SOP hman tura tih chu hman chhunzawm tur a nih rualin, COVID-19 vei mek awm lohna khuaa 'Sikul hawn theih' tih chu 'ZirnaIn hawn theih' tia thlak a ni. Inkaihhruaina hman mekah hian Kohhran Rorel Inkhawmpui, Bial Inkhawmpui chu chhun lamah Dan zawm chunga hman theih a ni a. Sports practice chu Indoor leh Outdoor ah phal niin Indoor-ah mi 10 aia tam lo, Outdoor-ah mi 25 aia tam lo an ni tur a ni a, Insawizawina hmun Gym pawh hawn phal a ni. 


High Court Judge-ah rawt

Aizawl District & Session Judge Marli Vankung chu Supreme Collegium-in High Court Judge tura a rawt mi 68 zingah a tel a, Marli Vankung hi Mizo High Court Judge 4-na tur niin Mizo hmeichhia leh Mizo Judicial Officer (MJS) High Court Judge-a lut hmasaber ni turin President pawmpuina nghah mek a ni. High Court Judge te ruat/rawttu Supreme Court Collegium hi Chief Justice of India (CJI) Justice NV. Ramana kaihhruai a ni a, ram chhunga High Court hrang 12 tan hming 68 an pawm zinga 44 te chu Advocate atangin a ni a, 24 te erawh chu Judicial Officer atangin an ni thung.


Hri danna la tawh pung zel

Mizorama kum 18 chunglam mi 7,75,106 an awm nia chhut niin heng zinga mi 6,58,444 te chu COVID-19 hri danna Dose khatna pek an ni tawh a, hri la thei atanga za zela 84.95 te chuan hri danna hi la tawhin an zinga 2,46,824 te chuan hri danna Dose 2-na an la tawh a, hei hi za zela 31.84 a ni bawk.


Remsiami lawmpuina hlan

Olympic Games neih zawh taka an chet that avangin Lalremsiami, India Women Hockey Team player chu Mankind Pharma Company Limited te chuan Zirtawpni khan a chenna In-ah tlawhin cheng nuai 11 an hlan a, he Company hian a khelhpui player dang te pawh pawisa hi an hlan bawk a ni.


Kawng siam mek thalo pawi an tih thu an sawi

Inrinni khan Chhumkhum - Chawngte kawng siam mek chungchang ah Lunglei Thalai Pawl huaihawt in Chawngte leh a chhehvel khawtlang hruaitute chu  Rualalung-ah an in hmukhawm a, Chhumkhum - Chawngte kawng APS Hydro Pvt. Ltd. in an thawh mek chu a nih dan tur anga thawh a nih loh avanga kawng thalo chu pawi an tih thu an sawi.

Comments

Chhiar Hlawhte