Mizoram-ah COVID-19 hri kai hmuh belh zel an ni

Inrinni khan Mizoram-ah Sample 7533 enfiah leh niin heng atang hian COVID-19 hri kai 967 hmuhchhuah leh an ni a, Sample enfiah atanga za zela 12.84 te chuan hri an kai a ni.

Inrinni khan ZMC-a RT-PCR Laboratory-ah Sample 1379 enfiah niin heng atang hian hri kai mi 218 hmuhchhuah an ni a, an vai hian Aizawl District-a Sample lak vek niin Venghnuai atangin hri kai 39 hmuh an ni a, Edenthar atangin 23 leh Bawngkawn atangin hri kai mi 19 hmuh an ni a, a bak hi Veng leh khua 49 ami an ni. Fluorescent Immunoassay (FIA) Test hmanga Sample enfiah 81 atangin hri kai mi 11 hmuh ni bawkin an zinga pahnih tih loh chu Aizawl khawpui chhung ami an ni.

District hrang hranga TrueNat Laboratory-ah Sample 432 enfiah ni bawkin heng atang hian hri kai mi 55 hmuh an ni a, Lawngtlai District-ah hri kai 32 hmuh niin Champhai District-ah 8, Mamit leh Khawzawl District-ah 4 ve ve, Lunglei District-ah mi 3 leh Siaha leh Serchhip District-ah hri kai mi 2 ve ve hmuh an ni bawk.

Rapid Antigen Test hmanga Sample enfiah 5641 atangin hri kai mi 683 hmuhchhuah an ni bawk a, an zinga 290 te chu Aizawl District a hri kai hmuhchhuah te niin Vengmal-a hri kai mi 10 leh a aia tam hmuhna Veng 8 lai a la awm a, a bak hi Veng leh khua 66 ami an ni a, Kolasib District atangin hri kai mi 117 hmuhchhuah niin Bilkhawthlir-ah hri kai mi 21 zet hmuhchhuah an ni a. Mamit District-ah hri kai mi 59 hmuh niin an zinga 26 chu Damparengpui ami an ni bawk. Lawngtlai District-ah hri kai mi 54 hmuhchhuah niin Siaha District-ah mi 44 hmuhchhuah an ni ve leh bawk a, Lunglei District-ah hri kai 41 hmuh niin Champhai District-ah hri kai mi 40 hmuh an ni a, Serchhip District-ah hri kai mi 24 hmuh ni bawkin Khawzawl District-ah 11, Hnahthial District-ah 2 leh Saitual District-ah hri kai mi pakhat hmuh a ni bawk.

Mizoram-a COVID-19 hri kai zingah mi 662 te chu nimin khan enkawl dam an ni ve leh thung a, heti hian nimin tlai dar 5:00 thleng khan Mizoram-a COVID-19 hri kai hmuhchhuah chu 63,784 ni tawhin an zinga 53,243 te chu enkawl dam an ni tawh a, hei hi hri kai hmuhchhuah atanga chhutin za zela 83.47 niin tunah hian hri kai enkawllai 10,318 an la awm mek a ni.

Hetihlai hian Mizoram-a COVID-19 hri kai zingah boral an la awm belh zel a, Zirtawpni zan khan R. Zochhuaki (87), Ramhlun North chu COVID-19 vanga boralin Inrinni zing dar 8:30 khan Khawvelthangi (81), Kolasib Venglai chu ZMC-ah a boral ve leh a. Nimin chawhma dar 10:00 khan Zothansanga (39), 2nd Bn. IR Hqrs. Khawzawl chu ZMC-ah COVID-19 vangin a boral ve leh bawk a, heti hian nimin tlai thleng khan hri kai zingah mi 223 an boral tawh a ni.