Lok Adalat thutkhawm nei

National Legal Services Authority, New Delhi in ruahmanna a siam dung zuiin Inrinni khan Gauhati High Court, Aizawl Bench leh State Legal Services Authority Office, New Capital Complex te bakah District 8-a District Legal Services Authority Office, District Court Complex ah te National Lok Adalat huaihawt a ni.

Mipuite Court tia sawi thin Lok Adalat-ah hian thubuai compoundable case te, Inhmun lo ram thubuai leh ro inchuh thubuai te, leiba thubuai te bakah thubuai dang tam tak a rel theih a. Lok Adalat ah hian Conciliator ten thubuai lian pui pui leh khirh-khan tak tak te pawh an lo rel fel tawh thin a ni.

Lok Adalat rorelna ah hian sum senga Ukil rawih a ngaih ve loh avangin senso a awm ve lova, Rorel kalphung hi Law Court nen chuan dang daihin, thiamloh chang zawk pawh awm se, inhremna pek a ngai kher lova. Thiam chang zawk pawh inphah hniam tura ngen leh thiamloh chang zawk pawhin a tih diklohna te pawma inremna zawnpui kha Lok Adalat thiltum ber chu a ni a, Lok Adalat in thubuai a rempui tawh te inremna/Award hi rel thatsak turin India ram Court sang berah pawh appeal kalpui theih a ni lo. 

Tun tuma Lok Adalat-ah hian Mizoram hmun hrang hrangah thubuai 1028 chhawpchhuah a ni a, heng zinga 225 te hi rel fel niin heng ah te hian Rs. 4,11,28,809/- thubuai chu relfel a ni a, Serchhip District-ah pawh thubuai 7-a Rs. 21,41,413/- ah inremna siamin relfel a ni.