Chanchin thar thenkhat :

Oil Depot-ah hma la mek

Supply Minister K. Lalrinliana chuan Assembly Session neih zawh takah Bairabi-a Oil Depot chungchanga Aizawl West-III bialtu MLA VL. Zaithanzama zawhna ziaka chhangin Bai-rabi-a Oil Depot siam tum hi chak taka hmalak mek a nih thu leh ram mamawh tur chin enfel tawh a nih thu a sawi a. “The Mizoram Land Purchase & Selection Board Meeting thuchhuak angin ram mamawh hi DC Kolasib leh Food, Civil Supplies & Consumer Affairs Department te chu ram neitute leh an ram dinhmun/hman dan te lo enfiah a, Rehabilitation & Resettlement hmanga ram hi lei a ngaih leh ngaih loh te lo enfel tura tih a ni,” a ti bawk.

Kumin atan NEET Exam nei

Nimin khan Mizoram-a Centre 4-ah zirlai 1,508-ten National Eligibility-cum-Entrance Test (NEET) 2021 an hmachhawn. Kumin a NEET Exam hi Centre 4- Pachhunga University College, T. Romana College, Govt. Aizawl North College leh Kendriya Vidhlaya-ah te buatsaih a ni a, COVID hripui laka exam hmachhawntute an him theihna turin uluk taka venhimna hnuaia SOP zawm chungin Exam hi buatsaih niin Hripui leng avanga In lama inkhunghrang Exam turte pawh midang nawlpui luh hma-a luhtir niin, building hrang hlakah Exam phalsak an ni. NEET 2021-ah hian Mizoram tan MBBS Seat 100 awmin, All India quota Seat 15 leh Mizoram quota Seat 85 a awm a ni.

Khaw 240-ah Vawk thi tawh

Mizoram District 11-a khua leh Veng 240-te chu Vawk hri lenna hmun, African Swine Fever (ASF) Infected Area-ah puan a ni tawh a, Mizoram hmun hrang hrangah ASF vang hian Vawk 26,720 thi tawhin Vawk 10,152 zet suat a ni tawh bawk. Hetihlai hian Mizoram hmun hrang hrangah chhan hriatloh a Vawk thu chu 1025 a tling tawh bawk a, heng te hi ASF vanga thi ni a rin an ni a, Veng leh khua 110 te chu hri lenna hmun nia rinhlelh zingah a awm mek bawk a ni.

CLP in Bazar thiah an tlawh

Congress Legislature Party hruaitute chuan Inrinni khan Aizawl new Market thiah tak chu a hmunah an tlawh a, Congress Legislature Party chuan Congress sawrkar lai atang tawhin Bazarpui a tahtawla sak thatna tur chu ruahmanin a chhunga eizawngtute, seat nghet nei chhungkua 1093 bakah nitina helaia eizawnga in zuar ve dang mi 800 chuangte an buai lutuk loh nan an insawnchhuahna tur building te ngaihtuahin ruahmanna fel tak nen a tahtawla sawn an ni tih an sawi a. MNF sawrkar hnuah ruahmanna leh remruatna fel engmah nei si lovin building thiah sak an ni tih sawiin, sawrkar hmalakna chu pawi an tih thu an sawi bawk.

Health Minister-ah thlen

BJP Mizoram Pradesh President, Van-lalhmuaka chu sawrkar laipui-a Minister hrang hranga Mizoram mamawh thlenin New Delhi ah a cham mek tih BJP chuan sawiin, Zirtawpni khan Union Health Minister Mansukh L. Man-daviya chu a Pisa-ah a hmu tih an sawi a. He hunah hian COVID-19 hri leng Mizoram in a tawrh dan leh Mizoram-a Health Infrastructure hrang hrang kan nei that tawk loh thu te a sawipui tih an sawi a. State sawrkar in Health Infrastructure tihchantlunna kawnga a thlen te ngaihpawimawhsak tur leh theihtawpa pui turin a hrilh bawk niin an sawi.