Latest News

Hri leng ziaawm hunah Police lak tum a ni

Chief Minister Zoramthanga chuan, Police post ruak sang chuang a awm thu leh hripui leng a ziaawm hunah Police engemawzat lak tum a nih thu a sawi.

Nimin-a Assembly Session neih ah ZPM Member C. Lalsawivunga'n ramri-a Mizoram Police duty te chungchanga Home Minister a zawhna kal zela ZPM Legislature Party Leader Lalduhoma leh ZPM Member Lalchhuanthanga zawh belhna te chu Home Minister aiawhin Chief Minister Zoramthanga chuan a chhang a, Police hnaruak hnawhkhah loh sang chuang a awm thu sawiin, chung hnaruak te hnawhkhat turin Department lam pawhin rawtna an siam tawh thu te, Police lakbelh loh theihloh dinhmunah an din thu leh, hemi atan hian hmachhawp pawh an nei tih a sawi a, hripui leng mek avangin Police lak hna kalpui chu tih theih a ni rihlo tih a sawiin, “Kan boruak in a zir vel leh engemaw zat chu lak kan tum,” a ti.

Chief Minister chuan, Mizoram leh Assam ramri-a Duty Police te chu Ration pek an ni tih sawiin, mipa pakhat tan nitin buhfai no hnih (2) hisap zela pek an nih thu a sawi a, Mizoram leh Assam inkar ramri-a Duty Police te tan mimal anga hamthatna emaw, a hranpaa hamthatna pek belh bik a awm lo tih sawiin, Police te an intluktlan lohna a siam theih bakah Finance Department remtihna te a ngaih avangin kawng a thui deuh a, Pay Commission in a tih bak leh Rules hran neih a nih loh avangin hemi kawngah hian hmalak a ni rihlo, a ti.

Ramri-a Police duty te chu an mamawh hrang hrang te sawrkar ah thlen tura an ngen angin Police te pawhin an mamawh te an thlen thin thu leh a theih ang angin an mamawh te chu pek an nih thu pawh Chief Minister chuan a sawi a, ramri-a duty COVID-19 hri kai te'n a thlawnin enkawlna an dawng dawn tih leh Police duty te hriselna kawnga endika viltu tur Doctor leh Nurse te pawh dah an tul chuan dah turin hmalak zel an tum thu a sawi bawk.

Comments

Chhiar Hlawhte