Hri kai mi 48 hmuh belh leh

Nimin khan Serchhip District-ah COVID-19 hri kai mi 48 hmuhchhuah niin Serchhip District-a hri kai hmuhchhuah chu 1268 an tling tawh.

Nimin a Serchhip District-a hri kai hmuh-chhuah zinga 24 te hi Keitum khuaa hri kai hmuh te niin hetianga Keitum khua a hri kai hmuh an nih leh tak avang hian hun engemaw chen an lo tihtawp tawh 4C pawh nimin atang khan hman tan a ni leh bawk a ni. Heng bakah hian Serchhip Town chhungah hri kai mi 21 hmuh ni bawkin an zinga mi 10 chu Chhim Veng mi an ni a, Dinthar Veng leh Bazar Veng-ah hri kai mi 4 ve ve hmuh niin Tuikhuah Veng, Field Veng leh IOC Veng-ah hri kai pakhat theuh hmuh an ni bawk a, TrueNat Laboratory-a Sample enfiah atangin Bazar Veng-ah hri kai mi 3 hmuh an ni bawk.

Serchhip District atanga Sample lak 155 te chu niminpiah khan ZMC-a RT-PCR Laboratory-ah enfiah ni bawkin heng atang hian hri kai mi 4 hmuhchhuah an ni bawk.

Serchhip District-a COVID-19 hri kai te zingah nimin khan mi 14 te chu anmahni enkawlna hmun atanga chhuahtir an ni ve leh a, an zinga mi 3 te hi Serchhip Field Veng mi, In lama hri kai enkawl niin midang 11 te hi Thenzawl-a IAH CCC-a enkawl an ni. Nimin tlai thleng khan Serchhip District-a hri kai hmuhchhuah chu 1268 ni tawhin an zinga 1007 te chu enkawl dam an ni tawh a, tunah hian enkawllai 258 an la awm a ni.