Dr. R. Lalthangliana’n sawrkar laipui-a Minister leh mi pawimawh hmu chhunzawm

New Delhi-a sawrkar laipui mi pawimawh te hmu-a cham mek Mizoram sawrkar-a Minister Dr. R. Lalthangliana chuan nimin khan sawrkar mi pawimawh thahnem tak a hmu leh.

Sawrkar laipui dawr-a New Delhi-a cham mek Higher & Technical Education Department changtu Minister, Dr. R. Lalthangliana hian nimin khan Union Education Minister Dharmendra Pradhan chu a Office-ah hmuin Mizoram University Southern Campus, Lunglei-a dinna tur senso cheng vbc. 400 dilna an lo thehluh tawh chungchang sawipuiin mamawh chi hrang hrang thawktu lak chungchang te, Hostel Building leh Faculty Building sakna chungchang te a sawipui a, Mizoram sawrkar in a dinna tur ram a tihfel tawh thu hrilh nawn lehin, chak taka hmalakpui turin a thlen a ni. Dr. R. Lalthangliana chuan RUSA chungchangah Faculty hlawh leh thil dang tang te a tan rei tawh avangin hlawh tur sum khawtlai-a awm te chu pechhuak thuai turin a ngen bakah RUSA-3 chu rawn kalpui leh ngei turin a ngen a. Union Minister hian hei hi chak takin bawh zui mek a nih thu alo hrilh a ni. Union Minister hian Mizoram-a Higher Education hmasawnna ngaihpawimawh a nih tur thu a lo hrilh bawk a ni.

Hemi hnu hian Dr. R. Lalthangliana chuan US Embassy-a Senior Officials te hmuin NITI Aayog-a Member, Dr. Vinok K. Paul pawh a hmu bawk a, Mizoram Health Department in an mamawh, a bikin ICU leh Health Department hmalakna atana pawimawh tur Niti Aayog anga buaipui theih turte an sawi dun nghal a. Post Covid in Mizoram economy kawng hrang hranga a tih tlakhniam avanga NITI Aayog atanga Mizoram in a mamawh tur tulte enpui leh zir chiang tura NITI Aayog atanga mithiam rawn tira, ngaihtuahpui tura a thlen chu a rang thei anga bawhzui vat a tum thu a lo hrilh a ni.

Hei bakah hian Union Textiles Secretary Upendra Prasad leh Addl.Secretary (Commerce) Rachna Shah-i te, Indian Council of Medical Research (ICMR)-ah Prof. Dr. Balram Bhargava te, Road Transport & Highways-ah MoS Gen. (Dr.) VK Singh leh Union Tribal Affairs Minister Arjun Munda te pawh a kawm leh bawk a ni.