Chanchin thar thenkhat :

DC pathum ten inbiakna nei

Mamit District Bawrhsap Dr. Lalrozama, Karimganj DC Khargeswar Pegu leh Hailakandi DC Rohan Kumar Jha te chuan Mizoram leh Assam Sawrkar State Level Meeting-in a phut angin nimin khan Video Conferencing hmangin inbiakna an nei a, he hunah hian ramri avanga inhuatna paih bo a, boruak tha a awm zel theih nan leh dan hnuaiah remna leh muanna a awm theih nan te, District pathum-a mipuite chu in mamawh tawn an nih angin ralmuang taka inkalpawhna a awm theihna tur chungchang sawiho niin lungrual taka pawmtlan a ni. DC pathumte chuan ramri leh a chhehvel ah harsatna a awm loh nan theihtawp chhuaha hmalak nise an ti a. Ramri-a buaina a awm palh pawha a punlun zel loh nan tlang takin inhrilhhriat tawn thin nise an ti a. State Border Issue chu District Level thuneitute rel fel theih a nih loh avangin tuna kan dinhmun chinah hian tumah intibuaitawn lova, inzahtawn tlang taka khawsaho turin an rel bawk.

College la hawn rihloh rel

Nimin khan Lunglei-ah District Bawrhsap Kulothungan A hovin District chhunga zirna In hrang hrang 3C, 4C leh Quarantine Centre a hman mek chungchang leh Lunglei District-a College-te hawn chungchang ngaihtuahin thutkhawm neih a ni a, he hunah hian Medical lam hotute leh College Principal ten tun dinhmunah College te hi hawn chi a an la ngaih loh thu an thlen angin Meeting chuan College-te la hawng lovin Online Class la kalpui zel nise an ti a. Tuna CCC, 4C leh Quarantine Centre an hman mek te dinhmun thlirin, hmun dang remchangah ngaihtuah belh nise an ti bawk.

Zo Hnam Chhan Ni hmang

Mizo Students’ Union (MSU) General Hqrs. chuan kumdanga an lo hman tawh thin angin nimin, Spetember thla chawlhkar hnihna Zirtawpni khan ‘Zo Hnam Chhan Ni’an hmang a, hmun hrang hrangah Hnam chhan inzirtirna thuziak târin hun an hmang a ni.

MPCC in zahthlak an ti

Mizoram Pradesh Congress Committee (MPCC) chuan Health Minister in Assembly House-a Mizoram in COVID-19 hripui kan do dan a tha thawkhat a tih thu leh India ram dangte nena khaikhinin Mizoram dinhmun a ziaawm hle tih a sawi chu COVID-19 dona kawnga Mizo-ram dinhmun dik tak ngaihtuah chuan zahthlak an tih thu leh mipui zahlohna a nih thu an sawi.

Nomination Committee siam

Tuirial bialtu MLA a boral tak avanga Assembly bye-election neih tur atan MNF Party chuan Nomination Committee an din ta a, karleh Thawh-lehni khian thutkhawm hmasa ber neih a ni ang. He Committee-ah hian MNF General Hqrs. a Elected OB te bakah Adviser mi 5 leh R. Rohmingliana te Member niin Harvey Lalrinliana chu Member Secretary a ni bawk.

Hri vanga harsatna nei tan SMATEE buatsaih dawn

Higher & Technical Education hnuaia Technical Wing chuan Mizoram State Council for Technical Education (MSCTE) hmingin niminpiah khan State Medical and Technical Entrance Examination (SMATEE), 2021 chu hlawhtling takin an buatsaih a. Exam diltu mi 1554 atangin zirlai 1322 (85%) in exam an ziak a. Zirlai 232(15%) an exam theilo thung. Exam theilo zingah hian COVID-19 hri kai 11 leh Home Quarantine lai 75 an tel a, heng COVID-19 vanga exam theilo te tan hian State Executive Committee (SEC) phalna lak a nih hnuah a hranpaa exam buatsaih sak leh an ni ang. Tun tumah hian Mizoram Polytechnic, Lunglei-ah a tum khatna atan chhim lama zirlaite tan Exam hi neih niin hei hi enchhinna atana buatsaih a ni.