Latest News

Chanchin thar thenkhat :

Raltlan in zirna chhunzawm

Myanmar buaina avanga Mizoram-a raltlan zinga zirlaiten Mizoram chhungah zirna chhun-zawmin, tun dinhmunah raltlan zinga zirlai 325 ten School hrang hrangah zirna an chhunzawm tawh. August 31, 2021 khan School Education Director James Lalrinchhana chuan thuchhuah siamin Mizoram hmun hrang hranga raltlan zinga zirlaite chu zirna chhunzawm tir an ni a. Tuipuiral Group YMA President MC. Lalramenga chuan raltlan zingah Mizoram-a zirna chhunzawm hi zirlai 325 an ni tih a sawi a ni. Zirna chhunzawm te hi Tuipuiral-ah an tam ber a, Farkawn-ah zirlai 136 zet awmin an tam ber a ni.

Hetih lai hian Tuipuiral tlangdung-ah hian raltlan mi 40 an luh belh leh tawh a, Tahan atangin mi 12 ten Vaphai hi lutin Zawlsei-ah Chin National Army(CNA) nupui fanau mi 28 an luh belh bawk a. Zawlsei-a raltlan awm mek mi 130 zinga 117 te chu CNA nupui fanaute niin Tuipuiral-ah hian raltlan 1478 an awm mek a ni.


JCB Operator kut an thlak

Vairengte Aitlang hmun-a Mizoram sawrkar in kawng a laih mekah nimin chawhnu dar 2:30 vel khan Assam Police te rawn kalin hnathawk mek JCB Operator chu kut an thlak bakah JCB pawh an khawih a, JCB chabi an laksak bawk a, Hailakandi SP chuan an tih a nihloh thu a sawi thung a. Kolasib SP chuan he hnathawh hi an chhunzawm tur thu leh JCB Operator pawh ven-himna pek a nih tur thu a sawi. Tunah hian Aitlang chhehvel-ah hmun 3-ah kawng laih mek a ni.


Sangha chi semchhuak

Lawngtlai-a Fisheries Department chuan nimin khan Lawngtlai Circle huamchhunga Sangha dil siamtute hnenah Socio-Economic Development Policy (SEDP) atangin Sangha chi nuai khat an semchhuak a. Heng Sangha chi an sem chhuah hi Common Carp, Mrigal leh Grass Carp (Indian major carp leh exotic carp) te a ni a. Sangha chi hi beneficiary-te hnenah 70% subsidy-a pek niin, pakhat Rs. 1.50 zelin pekchhuah a ni.


Hnathawh a harsatna en ho

Kaladan Multi-Modal Transit Transport Project kawng laih mek ah tunhnaia Lawngtlai District khawthlang lam khua zin mite harsatna an tawh chungchangah Central YLA chuan Contractor te niminpiah khan kokhawmin harsatna awm te a hmunah an en ho a. He harsatna an tawh ber hi leimin in kawng a hnawh thin vang niin KMTTP kawngpui chung tlang-ah NH-54 kawng thar sial mek a awm ve bawk avangin kawngpui hi leivung in a hnawh thin a, hemi chungchangah hian Contractor te hi mawhphurtu ah an inpuh tawn avangin a hmunah enfiah a ni.

Hemi hnu hian KMTTP Road Project hi India ram chinah tlawh ni bawkin Lei lian zawh loh awmchhun Ngengpui lui Bridge chu en a ni a. He Lei hi kumin November thla hian zawh an in beisei thu ARSS hotute chuan an sawi a. CYLA hotute chuan Contractor te chu theihtawp chhuahpui an inhuam thu leh mipuiin an thawhpui zel tur thu an hrilh bawk a ni.

Comments

Chhiar Hlawhte