AVBD in pawl hming-a thisen pe tha te hnenah Voluntary Blood Donation Award an hlan

Association for Voluntary Blood Donation (AVBD) General Hqrs. chuan nimin khan HYVE Hall, Aizawl-ah kum 2020-21 chhunga pawl hminga Thisen pe thate chawimawina, Voluntary Blood Donation Award hlanna hun an hmang a, he hun hi Health Minister Dr. R. Lalthangliana chuan a hmanpui a ni.

Voluntary Blood Donation Award hlanna hunah hian Health Minister Dr. R. Lalthangliana chuan mihring dam chhung tawite ah hian lainatna, khawngaihna leh hmangaihnaa mahni mihringpuite rawng kan bawlsak tluka pawimawh a awm lo tih sawiin, Ringtu kan nihna atanga kan mihringpuite hmangaihna kan lanchhuahtirna kawng pawimawh leh ropui tak chu a thlawna mamawhtute hnena thisen pek a nih thu a sawi a. COVID hripuiin Mizoram a nuai avangin nikum lam atangin a thlawna thisen pek a tlahniam tih pawh sawiin, AVBD ten theihtawp chhuaha tan lain Kohhran leh Pawl te an rawn penchhuak a, mualpho lutuk lovin kan kal theih phah tih sawiin, ABVD te hmalakna ah leh tlawmngaia thisen petute zawng zawng chungah Health Minister a nihna angin lawmthu a sawi bawk.

He hunah hian AVBD General Hqrs. President C. Lalnunnema chuan Voluntary Blood Donation-ah Mizoram chu State leh UT zingah a titha ber pawl a ni chho reng tih sawiin, hmeichhia te thisen pek (contribution) a sang em em a, India ram pumah hmeichhia te pek hi 5% a nih laiin Mizoram-ah chuan 30% a tling pha tih a sawi bawk.

He huna tarlan a nih danin kum 2020-2021 chhungin Mizoram-a Blood Bank hrang hrangah thisen Unit 26,704 pek a ni a. Heta tang hian Unit 23,949 (89.68%) chu a thlawnin Voluntary Donor ten an pek a ni a. Pawl hrang hrangte pek zat belhkhawm chu Unit 18,200 a ni a, mimal in Unit 8504 (31.85%) an pe thung. Kum 1993 khan Mizoram-ah Voluntary Blood Donation (a thlawna mahni insengso a, a petu leh a dawngtu pawh in hre tawn lova thisen pek) chu 1.79% chauh a ni a, kum 2020-2021-ah chuan 89.68 % a tling tawh a ni.

AVBD hi May 10, 1991 khan Aizawl-ah din a ni a, tunah chuan District pariat-ah Branch an nei a. AVBD thil tum ber chu - ‘Damlo te'n thisen an mamawh hun taka a thlawna thisen thianghlim an dawn theih nana hmalak’ leh ‘Voluntary Blood Donation 100% tlin’ a ni a. Tuna an ngaih pawimawh tak pakhat chu - Donation Camp ni kher lova mimal-a a thlawna thisen pe (Individual Voluntary Donor) an pun zel theihna tura tan lak a ni a. An thiltum a hlawhtlin theih nan kawng hrang hranga hma lain zirtirna te pawh an pe thin bawk a ni.

Category hrang hranga Voluntary Blood Donation Award dawngtute :

Voluntary Blood Donation Award hi tun tumah hian category 6-ah sem niin Educational Institution (College)-ah NSS Unit, Pachhunga University College chu pakhatna niin tum 7 Blood Donation Camp buatsaihin thisen Unit 364 an pe a. Educational Institution (Higher Secondary School)-ah NSS Unit, Synod HSS chu pakhatna niin tum 4 Blood Donation Camp an buatsaih ah thisen Unit 121 an pe a ni. Religious Group-ah Central KTP chu pakhatna niin tum 71 thisen pek an huaihawt ah thisen Unit 2,515 an pe a, YMA Group-ah Ramhlun North Branch chu pakhatna niin thisen Unit 181 an pe bawk. Pawl dang te zingah Mizo National Youth Front (MNYF) Hqrs. chuan thisen Unit 166 pein pakhatna an ni bawk a, heng te hi Aizawl District-a thisen pe te an ni a. Mizoram puma Blood Bank hrang hranga thisen pe tam ber Central KTP hnenah Award hlan ni bawkin Central KTP hming hian kum kalta chhung khan tum 103-ah thisen Unit 3483 pek a ni.