Nimin khan Serchhip-ah hri kai mi 19 hmuh belh an ni

Nimin khan Serchhip Vengchung-ah CO-VID-19 hri kai mi 18 zet hmuhchhuah an ni a, P&E Veng-ah hri kai pakhat hmuh ni bawkin Serchhip District-a hri kai hmuhchhuah chu 874 an tling tawh a ni.

Thudawn danin Serchhip Vengchung-a chhungkaw pakhat chu damlohna neia insawiselna an neih avangin an dinhmun enfiah sak an ni a, hetah hian COVID-19 hri an kai tih hmuhchhuah niin anmahni nana inkawmhnaihna nei te chhui zui nghal niin Sample enfiah chhunzawm a ni a, hetah hian hri kai hmuh belh zel niin nimin tlai-a Sample enfiah hna zawhfel thlengin Vengchung-ah hian hri kai mi 18 hmuh an ni a, hei bakah hian P&E Veng-ah hri kai mi pakhat hmuh ni bawkin Vengchung lam mi, tun-hnaia P&E Veng-a insawn nia thudawn a ni.

Tun tum hi COVID-19 hri leng avanga Serchhip khawpui chhungah ni khat-a tualchhung mi hri kai hmuhchhuah an tam ber ni nia hriat a ni a, kumin May 11-a Serchhip Chanmari Veng a hri kai mi 18 hmuhchhuah chu ni khat-a hri kai hmuhchhuah tam ber dawttu a ni thung a. Nimin-a hri kai zingah hian chhungkaw pakhat atanga hri kai mi 6 leh mi 5 hmuhna awmin an huamchhunga chhungkaw 38 chu In lama inkhunghrang tura tih an ni bawk.

Niminpiah khan Serchhip District-a TrueNat Laboratory-ah Sample 30 enfiah niin hri kai mi pakhat hmuhchhuah a ni bawk a, hri kai hmuhchhuah hi Bazar Veng ami niin hri kai tawh nen inkawmhnaihna nei an ni a. Rapid Antigen Test hmanga Sample enfiah 41-ah hri kai hmuh an awmlo thung.

Nimin khan Serchhip District-a hri kai enkawl mi 4 te chu IAH CCC, Thenzawl atanga chhuahtir an ni ve leh bawk a, heti hian nimin tlai thleng khan Serchhip District-a hri kai hmuh tawh chu 874 niin an zinga 837 te chu enkawl dam an ni tawh a, tunah hian hri kai enkawllai 37 la awmin hri kai zingah mi 3 an boral tawh a ni.