Mizoram-ah hri kai la hmuhchhuah belh zel a ni

Mizoram-ah COVID-19 hri kai hmuhchhuah an la pung zel a, Zirtawpni-a Sample enfiah atanga hri kai 893 hmuhchhuah a nih hnuah Inrinni-a Sample enfiah atangin hri kai 861 zet hmuhchhuah belh leh an ni.

Inrinni khan Mizoram-ah Sample 10932 enfiah niin heng atang hian hri kai 861 hi hmuhchhuah niin Sample enfiah zawng zawng atanga zaa 7.87 te chuan hri hi an kai a, ZMC-a RT-PCR Laboratory-ah Sample 2178 enfiah niin heng atang hian hri kai 346 hmuhchhuah an ni a, an vai hian Aizawl District-a Sample lak vek an ni.

District hrang hranga TrueNat Laboratory-ah Sample 538 enfiah ni bawkin hri kai 94 hmuh an ni a, an zinga mi 52 te chu Lunglei District-a hri kai hmuhchhuah an ni a, Mausen-ah hri kai mi 25 zet hmuh an ni. Siaha District-ah hri kai mi 20 hmuh an ni a, Champhai District-ah 11, Mamit District-ah 7 leh Lawngtlai District-ah hri kai mi 4 hmuh an ni bawk.

Rapid Antigen Test hmangin Inrinni khan Sample 8216 enfiah niin hri kai mi 421 hmuh an ni bawk a, heng zinga 322 te chu Aizawl District-a hri kai hmuhchhuah an ni a, Veng leh khaw mal-a hri kai mi 20 aia tam hmuhna Mualpui (37), Ramthar Veng (26), Bethlehem Vengthlang (23) leh Tuikual North (21) te an awm a ni. Heng bakah hian Lawngtlai District-ah hri kai mi 38 hmuh niin Lunglei District-ah 30, Champhai District-ah 16, Siaha District-ah 8, Serchhip District-ah 3 leh Mamit District-ah hri kai mi 2 hmuh an ni bawk.

Heti hian nimin tlai dar 5:00 thleng khan Mizoram-a COVID-19 hri kai hmuhchhuah chu 38,925 an tling ta a, Inrinni khan hri kai mi 643 te chu enkawl dam niin nimin khan mi 372 te enkawl dam an ni leh bawk a. Heti hian nimin tlai dar 5:00 thlenga Mizoram-a hri kai enkawl dam chu 26,759 ni tawhin hei hi hri kai hmuhchhuah atangin zaa 68.75 a ni a, tunah hian hri kai enkawllai 12,016 an la awm bawk a ni.

Mizoram-a hri kai zingah mi 150 zet an boral tawh :

Mizoram-a COVID-19 hri kai zingah mi 150 zet an boral tawh. Mizoram-a hri kai hmuhchhuah zingah hian  Thangkhumi (94), Bethlehem Veng chu July 30, 2021 tlai dar 5:46 khan boralin Zionthanga (75), Khatla East chu July 31, 2021 dar 1:15 khan a boral ve leh bawk a. Laltanliana (70), Rengtekawn, Kolasib pawh July 31, 2021 zing dar 7:30 khan boralin Neihkimi (75), Ramthar Veng, Aizawl chu July ni 31 zing dar 10:00 khan a boral ve leh a, C. Lalkima (96), Venghlui chu July 31, 2021 chhun dar 12:30 khan a boral ve leh bawk a ni.

Heng mite bakah hian Lalthianghlima (60), Chandmary, Lawngtlai chu nimin, August 1, 2021 zing dar 5:00 khan a boral ve lehin nimin zinga dar 7:30 khan Vanlalawmpuii (17), Electric Veng, Aizawl chu a boral ve leh bawk a ni.