Dampa Tiger Reserve-ah Sakei a awm tih puangin WII pawhin an thlalak a nemnghet tawh

Environment Forests & Climate Change Department changtu Minister, TJ. Lalnuntluanga chuan Dampa Tiger Reserve-ah Sakei a awm tih nimin khan a puang a. Dampa Tiger Reserve-a Sakei Thlalak hi Wildlife Institute of India (WII) chuan finfiahin a nemnghehpui tawh a ni.

Kum 2014 atang khan Dampa Tiger Reserve-ah hian Sakei a awm tawh lo anga ngaih a nih zet hnuah, May 16, 2021 khan Wildlife Institute of India (WII) hmalakna in Sakei a awm ngei a ni tih finfiah a ni a, WII Camera trap-in May 16, 2021 khan Dampa Tiger Reserve-ah hian Sakei thla hi a la fuh a, he Camera Trap hi Dampa Tiger Reserve-a Wildlife Guard Zakhuma kam a ni. Dampa Tiger Reserve-ah Sakei a awm tih puanna hun hi Principal Secretary & PCCF, Liandawla chuan kaihruaiin EF&CC Minister TJ. Lalnuntluanga chuan hun rei tak chhung Dampa Tiger Reserve-ah Sakei hnuhma hmuh a nih tawh loh hnuah Mizo pa, Pu Zakhuma'n Sakei thla a la fuh chu chhuanawm a tih thu a sawi a. Dampa Tiger Reserve chu nungcha humhalhna hmun danglam bik a nih thu pawh sawiin, Department-a thawktute leh a chhehvela chengte chu nungcha humhalhna kawngah thawhhona tha tak nei chhunzawm zel turin a sawm a ni. EF&CC Minister chuan EF&CC Department-a thawktute, Fied Director leh Zakhuma, Wildlife Guard, Dampa Tiger Reserve te bakah Wildlife Institute of India te hnenah lawmthu a sawi bawk.

Nimin-a he hun hmanna ah hian Chief Wildlife Warden Liankima Lailung chuan Sakei thla lak a nih dan sawiin, Dr. Lallianpuii Kawlni, Scientist C, Wildlife Institute of India chuan Dampa Tiger Reserve-a zirchianna kalpui mek a nih dan sawiin, Dampa Tiger Reserve-a Sakei thlalak chu Wildlife Institute of India chuan finfiahin a nemnghehpui tawh thu a sawi bawk.

Kum 2014 atang khan Dampa Tiger Reserve-ah hian Sakei a awm leh awm loh finfiahna a awm meuh tawh loh avangin Sakei a rem tawh anga ngaih a ni hman a. Kum 2018-a Sakei chhiar-pui hnuhnung berah pawh khan India rama Tiger Reserve ni si, Sakei nei lo pali zingah Mizoram hi chhiar tel a lo ni tawh bawk a. Hei vang hian a hmunpui lam atanga Tiger Reserve enkawlna tur atana sum pekchhuah pawh tihtlem a ni tawh a ni.