Chanchin thar thenkhat :

I&PR Minister in kawm

Information & Public Relations Minister, Lalruatkima chuan nimin khan MJA General Hqrs. Office Bearer-te leh National Media Correspondents te a Pisa-ah a kawm. He inkawmna ah hian I&PR Minister chuan tunhnaia ramri buaina chungchangah Mizoram-a chanchinthar lakkhawm leh thehdarh thintu Media zawng zawngten sawrkar hmalakna te theihtawpa an thlawp thinna chungah lawmthu a sawi a. Nimin-piah ah Assam Minister-te lo zinin Mizoram nen 'Joint Statement' siamin hming an ziak a, hemi rah duhawm tak pawh hmuh chhoh zel a bei-seiawm a ni, a ti a. Hun lo kal zelah pawh sawrkar hmalakna hrang hrang leh mipui hrilhhriatna kawngah sawrkar nena thawhhona tha neia theih-tawp chhuahpui zel turin a sawm bawk.

Mobile Services Network sawiho

Nimin khan Champhai-ah inbiakpawhna Mobile Services Network changtlung leh tha zawk a awm theih dan tur chungchang Addl. DC Henry C. Lalrawnkima hovin sawiho a ni a. He hunah hian Mobile Services Provider hrang hrang hotute hnen atangin inbiakpawhna tihhmasawn a nih theihna kawnga an hmalakna, harsatna tawh leh hmachhawp hrang hrangte ngaihthlak niin Services Provider-ten anmahni dawrtu mipuite harsatna sutkiang kawnga chak lehzuala hma an lak theihna turin Customer Service tha taka an kalpui theihna turin ruahmanna siam nise an ti a. Mobile network chian loh leh harsatna tawh changa inhrilhhriat zung zungna tur leh mipuite hrilhfiah theihna tur Situation Report Centre din tha an ti bawk.

Sept. 7-ah Session nei dawn

Mizoram Governor Dr. Hari Babu Kam-bhampati chuan Mizoram Legislative Assembly 8-na thutkhawm vawi 8-na chu September 7, 2021 zing dar 10:30 atanga nei turin nimin khan a ko a. He Session neih hun chhung tur leh hun hman dan tur chu Assembly Speaker kaihhruai Business Advisory Committee in an la duang ang.

Sawrkar thlawp tha ah ngai

Mizoram Pradesh Congress Committee (MPCC) Media Department chuan COVID-19 dona kawngah Mizoram mipui hian sawrkar hi an thlawp tha tawk tih chu an ngaihdan a ni tih nimin khan thuchhuah siama tarlangin, Hripui darh nachhan chu mipui thiamloh ni lovin, a hun taka sawrkar in Mass Test a kalpui duh loh vang te, Test-na atana mithiam ten a rintlak tawk loh tih vawi tam tak an sawi Rapid Antigen Test (RAgT) kan rin luih tlat vang te leh ramdang atang a lo lutte kan vil that tawk loh vangah an ngai tih an sawi a. “Sawr-kar hian hripui dona kawngah a tih tur dik tak ti se la, Village/Local Task Force-te leh NGO te kuta innghat ringawt lovin Covid Dedicated Hospital te, Laboratory-te pawh Third Wave a thlen hmain din belh zung zung zawk rawh se,” an ti bawk.

ZPM in sawrkar mawhpuh

ZPM General Hqrs. chuan Hrileng thawh thumna (3rd Wave) atana inbuatsaih hun tawh ah thawhhnihna avanga kan la buai em em mai chu sawrkar inthlahdah vang leh hri min dopui dan dik loh vangah an ngai tih nimin khan thu-chhuah siamin an tarlang a. Dedicated Hospital ruahman belh a, thawktu indaihlohna nasa tak awm sutkian a nih theihna tura thawktu lak belh thuai a tul thu te, ‘Test Runpui’ (Mass Testing) a chak thei ang ber a neih a tul thu te, sum dinhmun siamrem tura Assembly hial koh a tul pawh a ko mai turte in rawtna an lo siam tawh thin tih sawiin, “Heng rawtna hrang hrang te hi sawrkarin a ngaih pawimawh duh loh avanga tun dinhmun, dinhmun tha lo zawk hi lo thleng ta ah ZPM chuan a ngai a ni,” an ti.

POL hralh dan siam thar

Mizoram sawrkar-a Supply Department chuan nimin khan thupek tichhuak lehin Mizoram Filling Station hrang hranga POL hralhchhuah dan tur a ruahman thar leh a. Hemi ang hian Scooty-ah litre 3, lirthei ke 2 nei dang-ah litre 5, LMV-ah litre 10, MMV-ah litre 20 leh HMV ah litre 50 zel pekchhuah theih a ni anga, Buhfai/POL/LPG phur HMV te chu an Challan milin an kal lam leh haw lam daih pek tur a ni anga, Filling Station ten Petrol litre 5000 leh HSD litre 7000 stock an neih chinah FCS&CA hriatpuina leh phalna lovin pekchhuah tawh loh tur a ni bawk ang. Hei bakah hian Petrol Pump hi zing dar 6:00 atanga tlai dar 6:00 thleng (Sunday tiamlovin) hawn tur a ni bawk ang.