Chanchin thar thenkhat :

Mizoram Assembly kum 50 tlin lawmna neih a ni dawn

Mizoram Legislative Assembly in nakum May 10-a kum 50 a tlin lawm dan tur ngaihtuahin nimin khan Mizoram Legislative Assembly Golden Jubilee Organising Committee chu Assembly Annexe Building-ah an thukhawm a. Golden Jubilee lawmna hi ni hnih (2) chhung neih tura ruahman a nih bakah Jubilee puala Assembly Special Session neih turin tih a ni a. Jubilee lawmna programme kimchang buaipui turin Sub-Committee din tura tih a ni bawk.

He Committee-ah hian Mizoram Legislative Assembly Speaker chu Chairman niin Deputy Speaker chu Vice Chairman a ni a. Assembly Speaker lo ni tawh te, Parliamentary Affairs Department Minister leh Sitting MLA atangin Political Party tin aiawhte, Former Legislators aiawhte, Chief Secretary aiawh leh Assembly Secretariat-a Commissioner & Secretary ni lai leh lo ni tawhte an tel bawk a ni.

SHG te kawmna lo chhim

Nimin khan Prime Minister, Narendra Modi chuan DAY-NRLM hnuaia Self Help Group te kawmna a nei a, he hun hi Mizoram atang pawhin RD Minister Lalruatkima leh RD Secretary, R. Zarzosanga bakah MzSRLM Officials dang ten Video Conference hmangin an chhim ve a ni. He hun hi India ram State zawng zawnga State Rural Livelihoods Mission (SRLM) hnuaia SHG member te pawh lo chhim vek tura hriattir an nih angin Mizoram-ah pawh MzSRLM hnuai SHG member ten an chhim a. Tun dinhmunah Mizo-ram-ah hian DAY-NRLM hnuaiah hian SHG 7976 awmin member 63,808 an awm mek a ni.

Sialsuk PHC tan Ambulance pe

Aizawl South-III Bialtu MLA Prof. F. Lalnunmawia chuan a bial chhung Sialsuk PHC-a damlo phurhna tur Ambulance chu nimin khan Health & Family Welfare Department hnenah a pe a, Ambulance inhlanna hun tawi Directorate of Health Services-a neih ah COVID-19 hri len lai a nih avanga Ambulance mamawhna a san em avangin Ambulance thar hi Sialsuk leh a chhehvel khua ten tangkai taka an hman a beisei tih a sawi a, Ambulance Document leh chabi te Dr. F. Lallianhlira, Principal Director H&FW hnenah a hlan nghal a. Ambulance Registration pawh Health Department lamin an buaipui chho nghal dawn a ni. Ambulance hi Rs. 5,68,792 senga lei a ni. 

School hawn phalna pe tan

Mizoram sawrkar in hri leng avanga inkaih-hruaina a tihchhuah thar berah hri kai awmlohna khua ah te zirna In hawn a remtih angin Aizawl District-a zirna In 27 te chu hawn phalna pek an ni a, heng zirna In hawn turah hian ‘SOP on Reopening of Schools’ chu tha taka zawm tur a ni ang. Nimin-a zirna In hawn phalna pek tak te hi a tlangpuiin thingtlang khua zawk te niin High School leh Higher Secondary School te an ni tlangpui a, English Medium School thenkhat a tel bawk a ni.

Thu diklo a nih thu sawi

Mizoram Pradesh Congress Committee (MP-CC) chuan tunhnaia Sports Minister in Hnahthial Field No. 2-a phullem phah mek Project tawp tawh hnu a tih thar leh nia a sawi chu thu diklo nia sawiin, he Project hi thawh lai reng, tihtawp lailawkna awm miah lo a ni tih an sawi a. He hna hi Congress sawrkar lai kum 2018 kum laihawl vel atanga thawh tan a nih thu leh NEC hnuai a mi niin 100% Central Funding a nih thu an sawi bawk.

Police hnathawk tha thlang

India rama Police hnu chhui lama thawk tha te chawimawina, ‘Union Home Minister's Medal for Excellence in Investigation’ kumin a dawng tura thlanchhuah mi 152 te hming chu nimin khan puanchhuah niin Mizoram atangin SI VL. Chama Ralte, Office Incharge, Dungtlang Police Station (Champhai District) chu a tel a ni. Kumin a he chawimawina dawng tura thlan te zingah hian hmeichhia 28 an tel a ni.