Latest News

Mizoram-ah hri kai hmuh belh 576 leh dam 506 awm

Niminpiah khan Mizoram-ah Sample 6192 enfiah niin heng atang hian COVID-19 hri kai 576 hmuhchhuah leh an ni a, Sample enfiah zawng zawng atanga zaa 9.30 te chuan hri an kai a ni.

Niminpiah khan ZMC-a RT-PCR Laboratory-ah Sample 95 enfiah niin heng atang hian hri kai mi 2 hmuh an ni a, hri kai hmuhchhuah te hi Aizawl District-a Sample lak ve ve niin Bungkawn leh Muallungthu ami an ni.

Niminpiah khan District hrang hranga TrueNat Laboratory 9-ah Sample 310 enfiah ni bawkin heng atang hian hri kai mi 66 hmuh an ni bawk a, an zinga mi 41 te chu Champhai District ami niin Zokhawthar khua vek an ni a, Lunglei leh Lawngtlai District-ah hri kai mi 11 ve ve hmuh niin Hnahthial District-ah mi 2 leh Serchhip District-ah hri kai mi pakhat hmuh an ni bawk.

Rapid Antigen Test hmanga niminpiah-ah Sample enfiah 5787 atangin hri kai 508 hmuh an ni bawk a, an zinga 321 te chu Aizawl District ami niin hri kai hmuhchhuah tamna ber Ramhlun South-ah mi 19 hmuh niin Tlungvel-ah hri kai mi 14 hmuh an ni bawk a, Lawipu-ah 13 leh Zembawk-ah hri kai mi 12 hmuh an ni bawk a, a bak hi Veng leh khua 57 ami an ni.

Heng bakah hian RAgT hmangin Kolasib District-ah hri kai mi 71 hmuhchhuah niin Mamit District-ah 28, Lunglei District-ah 27, Lawngtlai District-ah 24, Siaha District-ah 17, Champhai District-ah 16 leh Saitual District-ah hri kai mi 4 hmuh an ni bawk.

Nimin khan Mizoram hmun hrang hrang atangin COVID-19 hri kai mi 506 te chu anmahni enkawlna hmun atanga chhuahtir niin nizan hmasa ah mi 332 chhuak bawkin niminpiah-a hri kai enkawl dam zawng zawng chu 1012 an ni a, hei hi Mizoram-ah ni khat-a hri kai enkawl dam an tam ber tum leh ni khat-a hri kai mi sang khat aia tam enkawl dam an awm hmasak ber a ni bawk.

Nimin tlai dar 5:00 thleng khan Mizoram-ah COVID-19 hri kai mi 46,896 hmuhchhuah an ni tawh a, an zinga 35,240 te chu enkawl dam ni tawhin hei hi hri kai hmuhchhuah atangin za zela 75.15 a ni a, tunah hian hri kai enkawllai 11,483 an la awm mek a ni. Nizan hmasa dar 9:30 khan Hmarchhungi (55), Maubawk, Aizawl chu COVID-19 vangin ZMC-ah a boral ve leh a, heti hian Mizoram-a hri kai zingah mi 173 an boral tawh a ni.

Tun dinhmunah Mizoram-a District 11 zingah hri kai enkawllai neilo an awm lova, hri kai enkawllai tamna ber Aizawl District-ah 8595 enkawl mek niin Kolasib District-ah 1000 enkawl mek an ni a, hetihlai hian hrikai enkawllai tlemna ber Khawzawl District-ah chuan mi pakhat enkawl mek a ni thung.

Comments

Chhiar Hlawhte