Latest News

Vegetable Supply Chain ruahman loh vangin nikum-a sum lak ang kumin ah la phak dawnlo

Serchhip Mat phai-a thlai chingtute leh thawnchhuaktute chuan hri leng avanga inkharkhip kalpui mekah thlai thar thawnchhuah leh hralhchhuah chungchangah harsatna lutuk an tawklo tih an sawi a, thlai chingtute chuan kumin ah Vegetable Supply Chain kalpui a nih loh avangin nikum-a sum lakluh erawh an la phak dawnlo hle tih an sawi.

COVID-19 hri leng avanga inkharkhipna kalpui mekah sawrkar in eichawp dawr, thlai, chawhmeh leh sa zawrhna te chu Ningani-ah chauh hawn a phal avanga khawsak phung danglam chungchangah LENKAWL zawhna chhangin Serchhip Mat phai-a thlai chingtu thenkhat te chuan harsatna lutuk an tawk lo tih an sawi a, an thlai tharchhuah zingah tunah hian Zikhlum chu a rem tan tawh thu leh Zikhlum Chang chawr leh Bawkbawn bakah Anhling te chu tharchhuah tam a ni rih tih an sawi a, heng te hi kar tir lamah lakhawmin Nilaini-ah a kharchhawng te hnenah an pek thin thu an sawi a, Bawkbawn bik-ah chuan a hmel mawilo te a awm hman thin avangin harsatna tlem tlem an tawh thu an sawi a. Serchhip Agriculture & Horticulture Cooperative Society hruaitute chuan nikum lamah Sawrkar in Vegetable Supply Chain tha tak a ruahman ang chu kumin hian kalpui a nih tak loh avang erawh chuan nikum lama an sum lakluh erawh nasa taka an phak dawnloh thu an sawi bawk a ni.

Hetihlai hian Serchhip Mat phai-a thlai tharchhuah kharchhawng-a Mizoram hmundang a hralhchhuak thin te chuan kumin-a hri leng avanga inkharkhip-ah harsatna lutuk an tawklo tih an sawi bawk a, hun dangah chawlkhar khat-a tum 2 vel thlai an thawnchhuah thin erawh sawrkar in Bazar hun bik a siam tak avangin chawlhkar khat-ah ni khat chiah an thawnchhuah theih chu an harsatna tawh lian ber a ni tih an sawi a. Serchhip thlai tharchhuah khaw danga thawnchhuak thin hi mi 15 atanga 20 vel an awm thu sawiin, heng mite hi mi 2 te inkawp in tum khat ah motor 2 te in chawhmeh hi an thawnchhuah thin thu an sawi a, hri leng avanga vawi khat chauh an chhuahpui theih avang hian an hralhchhuah erawh a tam phah chuanglo tih sawiin, Serchhip atang hian Aizawl, Champhai, Lunglei leh Lunglei atanga chhimlam khaw dangah te pawh chawhmeh hi an kalpui thin thu an sawi a. Thlai hralhchhuah tur lakkhawm chungchangah erawh harsatna an tawhloh thu an sawi a ni.

Thudawn danin Serchhip Mat phai atanga heng thlai tharchhuah hrang hrangte hi a thartu leh a leitute inkar ah hian sumdawng hlawm thum vel an awm niin a lang a, thlai thartute tharchhuah Mat phai atanga kharchhawng in an lak hi Aizawl-ah lo kharchhawng tu an awm ve leh a, heng mite pawh hian a zuarchhawng te hnenah hlanchhawng ve lehin hei hi mipuite chuan an lei ve theita chauh a, hei vang hian thlai thar zawrhchhuahna hi a tlawm lutuk theilo nia a lan thu kan Palai chuan a sawi bawk.

Comments

Popular News (Last 30 Days)