Latest News

Vawiin atangin Mizoram-ah kum 18-44 te COVID-19 hri danna pek an ni dawn

Vawiin atang hian Mizoram-ah kum 18 leh 44 inkar te COVID-19 hri danna pek tan a ni dawn a, Serchhip District-ah pawh hri danna hi pe ve turin inbuatsaih nghal a ni.

India ramah tun thla ni 1 atanga kum 18 leh kum 44 inkar te hnena COVID-19 hri danna pek tan an nih hnuah Mizoram sawrkar pawhin Vawiin atang hian kum 18 atanga 44 inkar te hi hri danna pe tan turin ruahmanna a siam a, hemi atan hian sawrkar laipui in a thlawnin vaccine dose 16,340 chu Mizoram sawrkar a pe a, kum 18 - 44 inkar vaccine a thlawna pek tur a nawlpuiin an dawn tur erawh a siamchhuaktu Serum Institute of India Pvt. Ltd. in a pekchhuah hun tur hriat a la ni lova, heti chung hian a dose hnihna tur pawh Order lehnghal tum a nih thu sawrkar thuchhuah chuan a tarlang a, Mizoram chhungah kum 18 atanga 44 inkarte hi nuai 5 chuang an awm a ni.

Vawiin atanga hri danna pek tan tura ngaih pawimawh hmasak tura sawrkar in a thlan te chu LPG phurtute leh mipui hnena semtute, Petrol pump-a hnathawk te, Bawnghnute sem te, Print & Electronic media-a thawkte leh chanchinbu semtute, PHE department-a tui semtu te, Power supply enkawltute, Damdawi dawr nghaktute, Bank-a thawk te, Airport-a thawktute, Public Transport-a driver leh conductor te, Post Office-a thawkte leh Mipui tana hna tangkai thawk, COVID-19 an lo kai palha mi tam tak hnena kaidarh thei te an ni.

Serchhip District Immunization Officer, Dr. Lalhlunpuii chuan kum 18 leh 44 inkar te hri danna pe tur hian an inbuatsaih mek tih sawiin, sawrkar in ngaih pawimawh hmasak tura a tih te hi hri danna pek hmasak an nih dawn thu a sawi a, heng mite list hi lakkhawm mek a nih thu leh an inpeihfel veleh Vaccine hi pek a nih dawn thu a sawi bawk.

Hetihlai hian Inrinni thleng khan Mizoram-ah mi 2,32,959 te chu COVID-19 Vaccine Dose 1-na pek ni tawhin an zinga 51,901 te chu Dose 2-na pek an ni tawh bawk a. Sawrkar thuchhuah in a tarlan danin Health Care Workers mi 14,668 te chu Vaccine Dose 1-na pein an zinga 11,378 te chu Dose 2-na pek an ni tawh a. Frontline Workers mi 29,755 te chu Vaccine Dose 1-na pein an zinga 17,605 te chu Dose 2-na pek an ni tawh bawk a. Kum 45-60 mi 1,30,842 te chu Vaccine Dose 1-na pein an zinga 4628 te chu Dose 2-na pek an ni tawh bawk. Kum 60 chunglam mi 57,694 te chu Dose 1-na pe tawhin an zinga mi 18290 te chu Dose 2-na pek an ni tawh bawk a. Kum 45 chunglam, Fronline Workers leh Healthcare Workers-te pek tura sawrkar laipuiin Mizoram a rawn pek dose 1,86,990 la awmin dose 90,000 vel dawn belh leh a nih chuan heng mite hi Full Dose an pek kim theih tawh beisei a ni.

Comments

Popular News (Last 30 Days)