Latest News

Tukin atanga May 11, 2021 zing thlengin Mizoram-ah Lockdown kalpui a ni leh dawn

Mizoram chhungah COVID-19 kai thar chak taka an pun zel avang leh a vei mek thahnem tak an awm avangin tukin dar 4:00 atanga May 11, 2021 zing dar 4:00 thleng khian Mizoram pumah Lockdown kalpui a ni dawn.

Tukin atanga Mizoram-a Lockdown kalpui tur chungchangah hian Inrinni khan Mizoram sawrkar chuan Inkaihhruaina tur pawh a tichhuak nghal a, he kaihhruaina thar ang hian Lockdown chhung hian Public Park, Picnic Spot, Movie Theatre, Gym, Football/Futsal Ground, Community Hall, Restaurant, Shopping Complex, Mall, phalna pek ni lo dawr te leh intawllenna hmun zawng zawng chu khar chhunzawm tur a ni a. Zirna In leh Sakhaw biakna hmun te chu khar chhunzawm tur niin Board Exam, All India Level Exam, Recruitment Exam adt. te chu phalna hranpa pek te chauh kalpui theih a ni anga. Heng ah te hian Exam huaihawttu ten SoP khauh takin an kengkawh tur a ni. Inneihna leh reception bakah Mitthi vuina ah mi 30 punkhawm phal a ni a, Mipui punkhawmna – Birthday leh Anniversary lawmna, Games & Sports, Book Release, lungphun leh intihhlimna ang chi reng reng te chu he hun chhung hian huaihawt phal a ni lo bawk.

Zin veivah chungchangah loh theihloh thilah lo chuan zin veivah loh tur niin tul bik thila zin veivak te chuan an chhuah tanna Veng VLTF/LLTF te hriatpuina lehkha an keng tur a ni. a Chu lehkha ah chuan an kal tanna (origin) leh zinna/kalna tur hmun (destination), ni leh darkar te a chuang tur a ni a. Chhungkua/mimal eizawnna kaihhnawih ni lo a huhova lui kal, ramhnuaia picnic/ intihhlim, hiking leh adventure sports te khap a ni bawk.

AMC huamchhung leh District Hqrs. ah te chuan he inkhuahkhirhna hun chhung hian tumahin mahni In/Compound an chhuahsan tur a ni lova, Building khata In hrang hrang luahte pawh intlawhpawh loh tur a ni. Amaherawhchu, tul bik thil vanga chhuah ngai – damdawi lei tur, nitin mamawh lei tur leh Doctor hnena inentir turte chuan an awmna VLTF/LLTF te phalna an la hmasa tur a ni a, nitin mamawh lei turte hian mahni awmna veng VLTF/LLTF te ruahmanna zawm ngei tur a ni a, lirthei veivah khap tlat niin hei hian phalna pek bik te a huam lo thung anga, District Magistrate ten zan dar 7:00 leh zing dar 4:00 inkar-ah Curfew an puang ang.

Nitin mamawh leh eichawp, thlai leh thei, sa, Thlai chi, lei tha, ran chaw leh hmanraw dawr, Bungraw phur motor mamawh (Oil leh spare parts) bakah hetiang motor siamna bik workshop/puncture works bakah hmasawnna hna peng thawhna atana bungraw mamawh zawrhna dawr te chu LLTF/VLTF te hriatpuina leh SoP zawm chungin Thawhtanni, Nilaini leh Zirtawpni-ah te hawn theih a ni ang , heng ni bakah hi chuan hawn phal a ni lo thung a. Mi panga aia tam 1o thawhna - Carpentry Workshop, Steel Fabrication Workshop, Bakery, Tailoring, Weaving leh hetiang lam thil thawhna hmunah te VLTF/LLTF te hriatpuinain hna thawh phal a ni a, Hmunkhat-a mipui pungkhawm tur vennan Bazarpui-a thlai leh thil dang zawrh khap a ni a. Mipui mimirin awlsam taka thlai leh chawhmeh an hmuh theih nan LLTF/VLTF ten ruahmanna an siam ang.

Sawrkar Pisa-ah Secretary/Head of Department/Head of Office ten hna tul zual thawktu

tur an ruat anga, Deputy Commissioner ten COVID-19 duty-a an ruat loh te chuan LLTF/VLTF te a tul apiangah an tawiawm ang. Hmasawnna hnathawh te, Lo, huan leh ranvulhna lama thawk turte tan phalna hranpa lak ngai lovin an hna thawh phalsak an ni a, hmun khat-a mi panga aia tam awmkhawm erawh khap niin ramriah pawh phal a ni bawk.

Comments

Chhiar Hlawhte