Latest News

Thla 6 chhungin Tripura Relief Camp khar beisei

Tripura Relief Camp hrang hrangte chu tun atanga thla 6 ral velah khar theih beisei a ni a, hetihlai hian Mizoram a rawn let duhlo Tripura a inbenbel thlang, Relief Camp-a voter 11,987 te chu Mizoram Electoral Roll-ah an la chuang.

Mizoram Bru Displaced People’s Forum (MBDPF) Gen. Secretary Bruno Msha chuan Relief Camp hrang hrang a awm mipa hnathawk thei chin te leh mipa awmlohna chhungkua a hmeichhe thenkhat te chu Dhalai District-a Haduk-lay leh Bongophapara-ah te an inbenbelna tur In sa in an awm mek a, North Tripura District-a Khahamthaipara leh Kaskaupara-ah te pawh inbenbelna tur In an sa tan bawk a ni.

Heng te hi luah theiha a awm hunah mipui nawlpui ten an luah tur thu sawiin Bruno Masha chuan, tun dinhmunah chuan inbengbel tur a mipui nawlpui an la kal loh thu leh tun atanga thla 6 vel ah Relief Camp an chhuahsan fel theih an inrin thu  a sawi a, Mizoram atangin Relief Camp-a lut thar an awm belh tawh lo nia an hriat thu a sawi bawk.

Hetihlai hian Tripura State-a inbengbel mek Relief Camp-a awm Bru te chu Mizoram Electoral Roll-ah an la chuang a, hemi chungchang ah hian Mizoram Election Department a Jt. Chief Electoral Officer David L. Pachuau chuan ECI atangin Mizoram Roll atanga paih tura tihna an la hmuh loh thu sawiin, kalphung pangngai ah chuan Tripura-a an inbenbel chuan Tripura Roll a luh an dil ang a, chumi atang chuan Mizoram Roll atanga paih an nihna tur a lo lan mai a rinawm thu a sawi bawk.

Comments

Chhiar Hlawhte