Serchhip District-ah hri kai 12 enkawl dam an ni

Nimin khan Serchhip District-ah COVID-19 hri kai mi pathum hmuhchhuah niin hri kai mi 12 enkawl dam an ni thung.

Nimin-a COVID-19 hri kai hmuhchhuah thar hi Keitum khua ami niin hri kai hmuhchhuah tawh nen inkawmhnaihna lo nei tawh a ni a, Keitum khua ah hian chawlhkar khat chhungin hri kai mi 21 hmuh ni tawhin an zinga mi 9 te chu Keitum-a 4C-ah dah an ni a, midang 12 te erawh chu Serchhip lamah en-kawl an ni thung. Nimin vek khan Thenzawl-ah hri kai mi pahnih hmuh belh leh an ni bawk a, Thenzawl-ah hian hri kai 23 hmuh an ni tawh a ni.

Nimin khan Serchhip District-a hri kai enkawl mi 12 te chu enkawl dam niin anmahni enkawlna hmun atanga chhuahtir an ni ve leh a, an zinga mi 6 te chu 4C Chhingchhip atanga chhuahtir an ni a, Nursing School CCC atangin mi pakhat chhuahtir a nih bakah Horticulture College CCC, Thenzawl atangin mi 3, PTS atangin mi pakhat leh In lama hri kai enkawl mi pakhat te an ni.

Heti hian nimin thleng khan Serchhip District-a COVID-19 hri kai hmuhchhuah chu 558 an ni tawh a, an zinga 461 te chu enkawl dam ni tawhin tunah hian hri kai enkawllai 95 an la awm mek a, hri kai hmuhchhuah zingah nunna chan mi pahnih an awm tawh a ni.