Latest News

Serchhip Bial Assembly bye-election Vote chhiar turin inbuatsaihna peihfel a ni

April 17, 2021-a Serchhip Bial Assembly bye-election neih a Vote tla te chhiar turin inbuatsaihna peihfel a ni tawh a, Election Commission of India in ruahmanna a siam angin he inthlanna a Vote tla te hi naktuk, May 2, 2021 zing dar 8:00 atangin Serchhip DC Office-a Vote chhiarna tur hmun atana ruahman ah chhiar a ni dawn a ni.

26-Serchhip (ST) Assembly Constituency-a Assembly bye-election neih a Vote tla te chhiar tura inbuatsaihna kal mek chungchangah nimin tlai khan Serchhip District Magistrate leh he inthlanna a Returning Officer, Kumar Abhishek chuan Serchhip DC Meeting Hall-ah Press Briefing neiin Vote chhiar tura inbuatsaihna te chu zawhfel vek tawh niin Vote chhiar tura an inpeih tawh thu a sawi a. Vote chhiarna atan hian Serchhip DC Conference Hall chu Counting Hall atana buatsaih a nih thu sawiin, COVID-19 himna dan te zawm chunga vote chhiar nan a zauh tawk thu a sawi a ni. Vote chhiar hna hi Micro-Observer mi 10, Counting Supervisor 8, Counting Assistant 10 bakah Data Entry Operator leh Supporting Staff ten Returning Officer leh Asst. Returning Officer te kaihhruaina hnuaiah an thawk dawn a, Election Commission of India dan angin Candidate leh an Counting Agents ten Counting Hall chhungah hian an thutchilh ve bawk ang.

Vote tla te chhiarna atan hian Dawhkan 7 ruahman niin Serchhip Bial-a Polling Station 29 chhiar zo tur hian thawh 5 (Round 5) a ngai dawn a, Round tinah EVM 5 zel chhiarin EVM-a Vote tla te hi chhiar zawh a nih hnuah he inthlanna a hman, VVPAT panga-a Vote tla te chu chhiar leh a ni dawn bawk a, hei hi EVM-a Vote tla nen a ruala puanchhuah tur a ni dawn thung a, he inthlanna a Round tin-a Vote tla te hi RO's Media Room leh Bye-Election Media Centre kaltlangin Media mite hnenah rang taka pekchhuah thin a ni ang.

Vote chhiar ni-ah hian COVID-19 hripui leng mek laka himna tur dan Election Commission of India leh Mizoram sawrkar thupek hrang hrangte tha taka kenkawh tur a ni a, hei vang hian Counting Hall mai nilovin Counting Centre/Campus (DC Office huamchhung) a vote chhiar ni-a lut thei tur chin hi uluk taka thliarfel niin, phalna nei chauh helaiah hian luh theih a ni dawn a ni. Counting Hall leh a chhehvel venhimna hi security thuah thum-a kalpui tur a ni a, phalna neite chauh luh theih a nih dawn avangin phalna lehkha neilo te chu result ngaichanga Counting Centre (DC Office Complex) pan lova Media kaltlanga lo ngaichang zawk tura ngen an ni.

Election Commission of India chuan vote chhiar ni-a Vote chhiartute leh Candidate leh an aiawh Party mite COVID-19 laka an himna tur dan felfai tak a duang a, vote chhiar ni a ‘Chak lawmna punkhawm' huaihawt pawh khap niin, Candidate thlantlin in Certificate a dawn hunah pawh mi pahnih aia tamin tawiawm phal a ni lo bawk.

He hunah hian Serchhip District Superintendent of Police, Stephen Lalrinawma chuan boruak muanawm tak hnuaia thianghlim taka Vote chhiar a nih theih nan ruahmanna an siam thu leh venhimna hna thawk turte pawh inruat fel a nih tawh thu a sawi a. Vote chhiar ni hian venhimna hi thuah thum-a thawh tur niin State Police, SAPF leh CAPF ten venhimna hna hi an thawk dawn tih a sawi a. Vote chhiarna a kal turte tan an lirthei chu DC Complex-ah tlanluh phal a nih dawnloh thu a sawi bawk.

Ramchhunga State leh UT-a inthlanna hrang hranga Vote tla te Vawiin-a chhiar tur ah hian Election Commission of India chuan kaihhruaina felfai tak a siam a. Vote chhiarna hmun te pawh hi damdawi hmanga tih thiang-hlim vek tura ruahman niin Vote chhiarna a kal turte chu Thermal Scanning tih sak vek tur an ni dawn a, Counting Agent te thut dan ruahman ah PPE ha leh ha lo an in thut karthlak ngei ngei tur a ni bawk.

Comments

Chhiar Hlawhte