Latest News

North Vanlaiphai in 4C siam

Serchhip District chhunga North Vanlaiphai khua chuan an khawchhung ah COVID-19 hri kai hmuhchhuah an awm-a enkawlna turin Community Covid Care Centre (CCCC) an buatsaih a, tun thla 26 thleng khian an khaw mipuite chu mahni hriselna in en chik turin an ti bawk.

North Vanlaiphai khua atanga thudawn danin CO-VID-19 hri leng mek ah hian North Vanlaiphai khua ah hian nimin thleng khan Sample 300 enfiah tawhin heng atang hian COVID-19 hri kai mi 5, mipa 3 leh hmeichhia 2 hmuh an ni tawh a, heng hri kai hmuhchhuah zinga pathum te hi hri kaina chiang taka hriatloh niin midang pahnih hi khawdang atanga an khua a haw an ni thung a, tunhnaia hri kai hmuhchhuah te hi zinna nei lemlo leh midang nen inkawmhnaihna pawh nei lemlo nia an lan avangin an khaw mipuite chu tun thla ni 26 thleng pawn-a chhuak lova mahni hriselna dinhmun in en chik turin an chah a, Sample Test hna pawh hi thawh chhunzawm zel tura ruahman a ni bawk.

North Vanlaiphai atanga kan thudawnna chuan an khua a hri kai hmuhchhuah te hi khaw hrana enkawl tura hruai a buaithlak avangin In lama enkawl (Home Isolation) vek an ni a, hri kai  hi pung zel thei dinhmunah an din avangin hri kai te enkawlna tur hian KVK Farmers’ Hostel chu Community Covid Care Centre (CCCC) atan ruahman niin nimin khan buaipui nghal a ni a, mi 22 awm thei tura ngaih a ni.

Bialtu MLA leh Home Minister, Lal-chamliana chuan North Vanlaiphai-a COVID-19 kai te leh CCCC in buatsaihna atan PPE, Oximeter, Gloves, Hand Sanitizer, Damdawi, chawhmeh, buhfai bag 5 leh Rs. 10,000/- chu VLTF hnenah a hlan a, bialtu MLA aiawh hian Lalremruata Chhangte, Secretary MNF Hqrs. chuan hlanin ani hian buhfai bag 4 a pe ve bawk. Health Minister Dr. R. Lalthangliana chuan N. Vanlaiphai VLTF tan Oxygen Concentrator pakhat a pe bawk a ni.

Comments

Chhiar Hlawhte