Ni khat-a hri kai hmuhchhuah la tlahniam theilo

Mizoram-a COVID-19 hri kai hmuhchhuah chuan hniam lam ala pan thei tak tak lova, niminpiah khan Mizoram-ah Sample 3485 enfiah leh niin heng atang hian hri kai 239 hmuhchhuah an ni a, Sample enfiah atanga za zela 6.85 te chuan hri an kai a ni.

Niminpiah khan ZMC Laboratory-ah Sample 952 enfiah niin heng atang hian hri kai mi 50 hmuh an ni a, an vai hian Aizawl District-a sample lak vek niin hri kai hmuhchhuah zinga 49 te chuan taksa-a hri kai lanchhuahna an nei lova, hri kai hmuhchhuah tawh nen inkawmhnaihna neih avanga inkhunghrang lai an ni tlangpui a, State pawn atanga rawn lut inkhunghrang lai mi 2 an awm bawk a ni.

District hrang hranga TrueNat Laboratory-ah Sample 175 enfiah niin heng atang hian hri kai mi 11 hmuh an ni bawk a, an zinga mi 10 te chu taksa-a hri kai lanchhuahna neilo an ni. TrueNat Laboratory-a hri kai hmuhchhuah zinga mi 7 te chu Siaha District ami niin Khawzawl District-ah hri kai 3 leh Lunglei District-ah hri kai pakhat hmuh an ni a, an vai hian hri kai tawh nen inkawmhnaihna neih atanga hri kai an ni.

Rapid Antigen Test hmangin niminpiah khan Mizoram-ah Sample 2358 enfiah niin heng atang hian hri kai 178 zet hmuh leh an ni thung a, an zinga 123 zet te chu taksa-a hri kai lanchhuahna nei an ni thung. RAgT hmanga hri kai hmuhchhuah zinga 99 te chu Aizawl District-a hmuh te niin an zingah hian hri kaina hriatloh leh chhuizui ngai mi 50 lai an awm a, an zingah hian Ambulance Driver te pawh an tel bawk a ni.

Lawngtlai District-ah hri kai 35 hmuh niin Kamalanagar-II ah 16 leh Kamalanagar-I ah 14 hmuh an ni a, Lunglei District-ah hri kai mi 20 hmuh niin Saitual District-ah hri kai 10 hmuh an ni. Kolasib District-ah hri kai mi 9 hmuh niin Serchhip District-ah hri kai pahnih hmuh niin Keitum leh Thenzawl khua ah pakhat ve ve an ni a, Champhai leh Mamit District-ah hri kai pakhat ve ve hmuh an ni bawk.

Nimin khan Mizoram-ah hri kai mi 156 te enkawl dam leh an ni a, heti hian Mizoram-a COVID-19 hri kai hmuhchhuah chu 11,382 ni tawhin an zinga 8643 te chu enkawl dam an ni tawh a, hei hi hri kai hmuh atanga chhutin zaa 75.93 a ni a, hri kai enkawllai 2704 an la awm a ni.