Ni khat-ah hri kai mi 148 zet hmuh belh leh an ni

Niminpiah khan Mizoram-ah Sample 2598 enfiah niin COVID-19 hri kai 184 hmuhchhuah leh an ni a, Mizoram-ah COVID-19 hri kai hmuhchhuah hi an la pung zel a ni.

Niminpiah khan ZMC Laboratory-ah Sample 800 enfiah niin heng atang hian COVID-19 hri kai mi 82 hmuh an ni a, an zinga 51 chu Aizawl District mi niin hri kai hmuhchhuah tawh nen inkawmhnaihna neih avanga inkhunghrang lai an ni a, midang 31 te hi Kolasib District-a Bairabi khua ami te niin hri kai hmuhchhuah tawh nen inkawmhnaihna neih avanga inkhunghrang lai an ni bawk.

Niminpiah khan District hrang hranga TrueNat Laboratory-ah Sample 248 enfiah ni bawkin heng atang hian hri kai mi 4 hmuh an ni a, Siaha, Champhai, Khawzawl leh Saitual District-ah pakhat theuh niin hri kai hmuhchhuah tawh nen inkawmhnaihna neih avanga inkhunghrang lai mi 2 leh State pawn atanga rawn haw inkhunghrang lai mi 2 an ni.

Mizoram hmun hrang hrangah niminpiah khan Rapid Antigen Test hmangin Sample 1550 enfiah a ni bawk a, heng atang hian hri kai mi 98 hmuhchhuah an ni bawk. Heng hri kai hmuhchhuah zinga mi 76 te chu Aizawl District-a hri kai hmuhchhuah an ni a, hri kaina chhui ngai leh hri kai tawh nen inkawmhnaihna nei mi 38 ve ve an ni. Lawngtlai District-ah hri kai 7 hmuh niin an vai hian hri kaina hriatloh leh chhui ngai an ni a, Kolasib District leh Serchhip District-ah hri kai mi 5 hmuh niin Lunglei leh Saitual District-ah hri kai mi 2 hmuh an ni a, Mamit District-ah hri kai pakhat hmuh a ni bawk.

Nimin leh nizan khan Mizoram hmun hrang hrangah COVID-19 hri kai mi 177 te chu enkawl dam an ni ve leh bawk a, heti hian nizan dar 9:00 thleng khan Mizoram-a hri kai hmuhchhuah chu 9252 niin an zinga 7271 te chu enkawl dam an ni tawh a, hri kai hmuhchhuah atanga za zela 78.58 te chu enkawl dam ni tawhin tunah hian hri kai enkawllai 1951 an la awm mek a. Hri kai enkawllai tamna ber Aizawl District-ah 1485 zet enkawllai an awm a ni.

Hri kai zingah nunna chan mi 30 awm tawh :

Mizoram-a COVID-19 hri kai enkawl zingah nimin khan nunna chan mi pakhat awm lehin Mizoram-a hri kai hmuhchhuah ah nunna chan mi 30 an awm ta a ni. Nimin-a COVID-19 hri kai enkawl dam tak hi Lalrinpuia (71), Thiak niin tun thla ni 12 khan COVID-19 hri a kai tih hmuhchhuah a ni a, ZMC-ah enkawl niin tun thla ni 18-ah ICU-ah dahluh a ni a, amaherawh chu nimin zing dar 10:10 khan COVID-19 Pneumonia vangin a boral zui ta a ni. Lalrinpuia hi Ril TB nei thin a ni. Heti hian Mizoram-a COVID-19 hri kai zingah nunna chan mi 30 an tling ta a, heng zinga 15 chu tun thla chhunga boral an ni.