Mizoram-ah hri kai 290 hmuhchhuah belh leh an ni

Niminpiah khan Mizoram-ah Sample 4303 enfiah niin heng atang hian COVID-19 hri kai 290 zet hmuh belh leh an ni a, heng zinga 159 te chu taksa-a hri kai lanchhuahna nei an ni.

Niminpiah khan ZMC Laboratory-ah Sample 1741 enfiah niin heng atang hian hri kai 87 hmuhchhuah an ni a, an zinga 85 te chu taksa-a hri kai lanchhuahna neilo an ni a, an zinga a tam zawk te hi hri kai nen inkawmhnaihna neih avanga inkhung-hrang lai an ni a, State pawn atanga rawn haw mi 3 awmin ZMC-a thawk pakhat leh hri kai enkawltu mi pahnih an tel bawk a ni.

District hrang hranga TrueNat Laboratory-ah niminpiah khan Sample 148 enfiah niin hri kai mi 6 hmuh an ni bawk a, an zinga pathum chu Siaha District ami niin Lunglei, Champhai leh Serchhip District-ah hri kai pakhat theuh hmuh an ni a, an zinga 5 te hi State pawn atanga rawn haw niin midang pakhat hi hri kai nen inkawmhnaihna nei a ni thung.

Niminpiah khan Mizoram-ah Rapid Antigen Test hmangin Sample 2414 enfiah leh a ni bawk a, heng atang hian hri kai 197 zet hmuh niin an zinga 157 te chu taksa-a hri kai lanchhuahna nei an ni bawk. Aizawl District-ah hri kai 124 hmuhchhuah an ni a, Saron Veng ah hri kai 21 hmuh niin Central Jail, Tuivamit-a Jail tang te zingah hri kai mi 20 hmuh an ni bawk. Lawngtlai District-ah hri kai mi 29 hmuh niin an zinga 22 te chu hri kaina hriatloh leh chhui ngai an ni a, Kamalanagar-II ah mi 17 zet hmuh leh an ni a, Kamalanagar-I ah mi 5 hmuh an ni bawk. Lunglei District-ah hri kai 17 hmuh niin mi 3 te chu hri kaina chhui ngai an ni a, Serchhip District-ah hri kai 10 hmuh niin hri kaina chhui ngai pathum an awm a. Khawzawl District-ah hri kai mi 3 hmuh niin Saitual District-ah hri kai mi 2 hmuh an ni bawk.

Nimin khan Mizoram-a COVID-19 hri kai enkawl mi 141 te chu enkawl dam an ni ve leh bawk a, heti hian nimin tlai dar 5:00 thlenga Mizoram-a hri kai hmuhchhuah chu 10,621 niin heng zinga 8160 te chu enkawl dam an ni tawh a, hei hi hri kai hmuhchhuah atanga chhutin za zela 76.82 a ni a, tunah hian hri kai enkawllai 2427 la awmin hri kai zingah nunna chan mi 34 an awm tawh bawk a ni.

Integrated Disease Surveillance Programme (IDSP) chhinchhiah danin May ni 1 atanga niminpiah thleng khan Mizoram-ah COVID-19 hri kai 4,490 hmuhchhuah an ni a. An zinga 2131 hi taksa-a hri kai lan-chhuahna nei niin hri kai lanchhuahna neilo 2,359 an awm a. Hri kai te hi naupang kum 1 hnuailam 36; kum 1-10 mi 500; kum 11 leh 20 inkar mi 729; kum 21 leh 30 inkar mi 1093; kum 31 leh 40 inkar mi 891; kum 41 atanga 50 mi 591; kum 51 leh 60 inkar mi 372; kum 61 leh 70 inkar mi 165; kum 71 leh 80 inkar mi 87; kum 80 chung lam mi 27 an ni.