Latest News

Bialtu MLA leh Agri. Minister hmalakna ah Chamdur Zau-a leilet neitute an lawm

Serchhip Mat Phai Chamdur zau-a Leilet neitute chuan Chamdur Zau panna kawng siamna tur sum bialtu MLA in a pe leh Tuikawng siamthatna tur sum Agriculture Minister in a pe chu an lawm hle tih an sawi a. Heng sum an hmuh hmang hian harsatna an tawh thin tam tak sutkian a nih an beisei thu an sawi bawk.

Serchhip Chamdur Zau-a sawrkar hmalakna hi nimin khan Serchhip-a thuthar thehdarhtu thenkhat te chuan tlawhin Chamdur FMC leh Water User Association-a President, CL. Ramngaia leh Secretary, C. Vanlalhmuaka te chuan an lo dawngsawng a. Lumtui Zau atanga Chamdur thleng kawng zawhin tunhnaia Bialtu MLA, Lalduhoma'n MLA Fund cheng nuai 1.5 a pek hmanga kawng chei thar leh Irrigation Department changtu Minister, C. Lalrinsanga'n cheng nuai 1.5 a pek hmanga Tuikawng siamthat hna an thawh te chu an thlir a ni.

FMC hruaitute chuan sawrkar hotute zarah henglai hmun panna kawng siamna tur hi cheng tam tak ruahman a nih tawh thu sawiin, amaherawh chu an beisei angin hna erawh thawh a ni meuhlo tih an sawi a. Kum 2008 vel khan MIP atangin Zawlpui to Chamdur kawng hi laih tlang a lo nih tawh thu sawiin, amaherawh chu kawng hi a grade a thatloh avangin rit phur lirthei tan zawh ngam a nih loh thu leh Fur ah phei chuan 4 Wheel (4X4) tan lo chuan zawh ngam a ni lo tih an sawi a. Hemi hnu kum 2014 khan Lumtui atanga Saphailui-a tuikhuah thleng siam niin kawng awmsa tihhniam a nih laiin Saphailui tuikhuah atanga Chamdur thleng erawh khawih a nilo tih an sawi a. Kum 2016-2017 khan Agriculture Department atangin Lumtui atanga Chamdur kawng siamna tur cheng nuai 12.4 awm lehin hna inhralhchhawnna nasa tak a awm nia an hriat thu leh sum tlemte hmangin Chamdur atanga Saphailui Tuikhuah inkar siamin, hemi inkar-a awm leilet-a an penna, Farm Road an tih atanga Bungtlang lam panna kawng an khawih phei chu zawh ngam a nih loh thu leh Motor pawhin an zawh ngailoh thu an sawi a. Hei mai bakah hian kum 2017-2018 a NEDP atanga Side Drain siamna tur sum ruahman awm nia an hriat ah hnathawh a awm an hriatloh thu an sawi bawk.

Tunhnaiah Chamdur kawng siamthatna atan hian Bialtu MLA, Lalduhoma chuan MLA Fund atangin cheng nuai 1.5 pein he sum hmang hian an kawng cheithat hna hi an thawh bakah a hmaa lirthei in an kal ngamlohna, Farm Road atanga Bungtlang lam panna kawng pawh tunah chuan lirthei zawh theih tura an siamthat bakah Farm Road pawh a thar tha taka an siam tawh thu an sawi a. Bialtu MLA hmalakna ah an lawm hle tih an sawi. Hei bakah hian kumin hian Irrigation Department changtu Minister, C. Lalrinsanga'n Tuikawng thalo siamthatna atan cheng nuai 1.5 a pek thu pawh FMC hruaitute chuan sawiin, he sum hmang hian an Tuikawng thalo te siamin hma an lak thu an sawi a. Kum 2/3 chhung vel tui neih thatloh avanga chhungkaw 5 ten buh an thar theihloh pawh kumin ah chuan thar theih tawh an inbeisei tih an sawi a, hetianga Agriculture Minister hmalakna ah hian an lawm hle tih an sawi bawk.

Chamdur FMC hruaitute chuan Chamdur zau-ah hian ram nei chhungkaw 70 vel an awm tih an sawi a, chhungkaw 25 vel te chuan Leilet (WRC) an neih thu sawiin, helai hmun atang hian kumtin buh leh thlai thahnem tak an tharchhuah thin thu an sawi a. Tuna kawng siamthat a nih hma hian Chamdur atang hian Chawm Kai lamah an kal thin thu sawiin, a kawng a thui avang leh Mat lui kan a tul avangin Fur lai phei chuan mihring in an thlai tharchhuah te an phurh haw vek a tul thu an sawi a. Heng harsatna tam tak te hi tuna kawng siamthat a nih hnu hi chuan tawk tawhlo tura an inbeisei thu an sawi bawk.

Chamdur FMC hruaitute chuan heng hmalakna hrang hrang te hmalakna tur tam tak la awm thuthar thehdarhtu ten an tlawh leh an hmuh sak chu lawmawm an tih thu an sawi bawk.

Comments

Chhiar Hlawhte