Mizoram-ah COVID-19 hri kai 113 hmuh belh leh

Pathianni khan Mizoram-ah Sample 811 enfiah niin heng atang hian COVID-19 hri kai 113 hmuhchhuah an ni a, Sample enfiah atanga za zela 13.93 zetin hri an kai a ni.

Pathianni khan ZMC Laboratory chu tihfai a nih avangin Sample enfiah a awm lova, District hrang hranga TrueNat Laboratory-ah Sample 108 enfiah niin heng atang hian hri kai 8 hmuhchhuah an ni a, an zinga mi 5 te chu Lunglei District ami niin Nunsury-I ah mi 4 leh Tlabung-ah mi pakhat an ni a, Champhai District-ah hri kai mi 3 hmuh niin an zinga pahnih te chu hri kai nen inkawmhnaihna nei tawh niin midang pakhat hi State pawn atanga rawn haw a ni thung.

Pathianni khan Mizoram-ah Rapid Antigen Test hmangin Sample 703 enfiah a ni bawk a, heng atang hian hri kai mi 105 hmuhchhuah an ni a, heng zingah hian hri kai lanchhuahna nei mi 80 awmin midang 25 te chu hri kai lanchhuahna neilo an ni. Aizawl District-ah hri kai 78 zet hmuh leh an ni a, an zinga 18 te chu Aizawl Saron Veng ami niin hri kaina hriatloh leh chhuizui ngai 33 an awm a ni.

Lawngtlai District-ah hri kai 19 hmuhchhuah niin Kamalanagar-II ah mi 11, Kamalanagar-I ah 7 leh Kamalanagar-III ah pakhat an ni a, Serchhip District-ah hri kai mi 4 hmuh niin Siaha District leh Kolasib District-ah mi 2 ve ve hmuh an ni bawk.

Heti hian Mizoram-a COVID-19 hri kai hmuhchhuah chu 10,332 an ni ta a, nimin khan hri kai mi 180 te chu enkawl dam leh niin heng mite nen hian Mizoram-a hri kai enkawl dam chu 8019 an ni tawh a, hei hi hri kai hmuhchhuah atanga chhutin za zela 77.61 niin tunah hian hri kai enkawllai 2279 an la awm mek a, hri kai zingah nunna chan mi 34 an awm tawh bawk a ni.