Mizoram-ah Black Fungus la awmlo nia hriat a ni

India rama COVID-19 vei te zinga natna hluar thar, Black Fungus natna kai chu tun dinhmunah Mizoram-ah an la awm lo niin COVID-19 chungchanga sawrkar aiawha thupuangtu, Dr. Pachuau Lalmalsawma chuan a sawi.

Hemi chungchanga thuthar thehdarhtute zawhna chhangin Dr. Pachuau Lalmalsawma chuan Black Fungus chungchang hi an sawi ho tawh thu leh Mizoram-ah chuan Black Fungus natna kai hmuh a la ni loh thu a sawi a, “He natna kai lo awm pawh ni se hai tur ni-ah pawh ngaih a ni lo,” a ti a. India rama State thenkhatah Black Fungus hi buaipui a hlawh tan mek a. Mizoram-ah he natna kai an awm pawhin enkawl ve thei tura an inngaih thu leh an inrin reng thu sawiin, “A damdawi Amphotericin-B tih ang kha a awm vek. Enkawl ve thei tur chu kan ni. Thlabarna chhan tur a awm rih lo,” a ti.

Dr. Pachuau Lalmalsawma chuan, Black Fungus hi steroid hmansual avangte a awm thei a nih avangin Zoram Medical College (ZMC)-a damlo an enkawlte lakah pawh hmang fimkhur tura an inchah tawh thu leh, he natna hri kai an awm leh awm loh chik zawka enfiah reng turin thawktute hriattir an nih tawh thu a sawi a. Black Fungus hi COVID-19 hri te anga mihring leh mihring atanga inkaidarh theih a nih loh thu a sawi bawk.

Tunhnaiah ramchhungah Black Fungus bakah Yellow leh White Fungus a hluar thar hle nia sawi a ni a, Dr. Pachuau Lalmalsawma chuan, “Fungus kan tih hian chi hrang hrang a awm a, natna a thlen dan pawh a inang vek chuang lo,” tiin a bikin he'ng natna te hi natna benvawn tih ang chi nei ten an tuar na zual bik nia a lan thu a sawi.

Sawrkar laipuiin Black Fungus hi Epidemic Diseases Act, 1897 hnuaiah notifiable Disease-a puang turin State hrang hrang leh UT te hriattir tawhin, State 11 in an puang tawh a, Mizo-ram-ah pawh ah sawrkar in a puan beisei a ni.