Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Deputy Chief Minister in a bial chhungah sem

Deputy Chief Minister leh Tuichang bialtu MLA, Tawnluia’n a bial chhunga damdawi In leh VLTF te hnena COVID-19 hrileng dona hmanrua engemawzat a pekte chu nimin khan Khawzawl atangin semchhuah a ni.

Tuichang bial-a damdawi In pathum leh Village Level Task Force (VLTF) 24 te hnena COVID-19 hri leng dona hmanrua Deputy Chief Minister in a pek te hi nimin khan Khawzawl phurh thlen niin nimin vek khan heng bungrua te lo dawnsawnna leh semchhuahna chu Khawzawl DC Office tual-ah neih nghal a ni a. He hunah hian Khawzawl District Bawrhsap, Zothanmawia chuan Covid-19 hrileng dona atana mamawh tak mai hmanrua te a hun taka dawn a ni thin chu lawmawm a tih thu sawiin, Khawzawl District mipuite ngaihtuah em em thintu bialtu MLA chungah lawmthu a sawi a. COVID-19 dona hmanrua te chu Hospital leh VLTF-te kutah hman lohin a awm mai mai dawn lo a, tangkai taka hman tura Deputy CM in a rawn pek a nih ang ngeiin chhawr tangkai tum a nih thu a sawi bawk.

Mipui nawlpuiin COVID-19 vanga inkhuahkhirhna Dan te tha taka an zawm chu lawmawm a tih thu pawh sawiin Khawzawl District Bawrhsap chuan, COVID-19 hrilengin a hma aiin Khawzawl District pawh a hnaih lehzual tawh a, chuvangin mahni In-a tawm tama thuawih zel a tul a ni, a ti bawk. VLTF-te chu an veng/khaw chhunga chhuanchham leh harsa bik an awm a nih phawt chuan thuneitute hriattir vat thin turin a chah a. Hemi hnu hian Damdawi In pathum leh VLTF aiawhte hnenah bungruate hi a hlan chhunzawm nghal a ni.

Deputy Chief Minister in hrileng dona hmanrua a pek zingah hian Tuichang Assembly Constituency huamchhunga Damdawi In pathum- District Hospital Khawzawl, Khawhai PHC leh Sialhawk PHC-a hman turin PPE Full Set 110, Facemask 900, Hand Sanitizer Bottle 20, Face Shield 90, Glove Box 40 bakah Pulse Oxymeter 20, Thermometer Digital 20, Steamer 30, Bleaching Powder bag 4 leh Sodium Hypochlorite Solution gallon 14 a tel a. VLTF 24 te hnenah Facemask engemawzat leh Hand Sanitizer litre 5 theuh pek an ni bawk.

Comments

Chhiar Hlawhte