Latest News

Leisekawt Mual ko dawlna lungrem chim YMA ten a hmunah kalin an enfiah

Tunhnaia Serchhip P&E Veng, Leisekawt mual ko-a Rural Development Department lungrem chim chu nimin khan Serchhip Sub-Hqrs. YMA Vigilance and Monitoring Committee hruaitute chuan tlawhin an enfiah.


Nikum lama Leisekawt Mual laihzauh a nih avanga RD Department ram laihchhiat dawlna tura lungrem hi tunhnai khan a chim a, he lungrem chim hi a hmunah nimin khan YMA Sub-Hqrs. Serchhip Vigilance & Monitoring Committee chuan enfiahin Serchhip BDO, Vanlalhmachhuana leh thawktu dang ten an lo dawngsawng a ni. He hna hi Departmental Work a thawh niin MGNREGS Fund atangin nuai 20 estimate a thawh a ni a, amaherawh chu a hna hi a lo hautak avangin sum dang dang te pawtkhawmin nuai 30 chuang an hmang tawh niin a enkawltute chuan an sawi a, helai hmunah hian Futsal Ground tha tak siam an tum tih sawiin, amaherawhchu vanduaithlak takin lungrem a chim leh tak si avang hian sum sen belh leh teuh a ngai dawn a, a tum tak Futsal Ground hi an puitlin thei angem tih chu a hriat mai theih tawhloh thu a enkawltute chuan an sawi bawk.

He lungrem hi a chim dan te ngun taka enfiah a niin a lungrem chim chhan ber ni a lang chu tunhnaia ruah lo sur thut avang khan chung lam atangin tuihawk nasa takin a lut a, a lungrem hi a la inchar that hman siloh avangin a tawlhpui ta ni a an hriat thu a enkawltute chuan an sawi a. A hnathawh kalhmangah chuan an duh uluk thu leh a tha thei ang berin an thawk nia an hriat thu an sawi bawk. YMA hruaitute chuan hmasawnna hnathawh mek ruah sur avanga chim ta chu pawi an tih thu an sawi a, a siamthat leh dan turah fimkhur zawka a leilung kalhmang te enfiah chunga chhunzawm leh turin an ngen bakah mipuite tana tha zawk tur ni a an hriat rawtna hrang hrangte an thlen bawk a ni.

Comments

Popular News (Last 30 Days)