Latest News

Chanchin thar thenkhat :

District thar tan ruahman

Health Minister Dr. R. Lalthangliana hmalakna in District thar pathum -Hnahthial, Khawzawl leh Saitual damdawi In tih changtlunna tura COVID-19 Vaccine dahthatna tur Deep Freezer pakhat leh Ice Lined Refrigerator (ILR) pahnih ruahman niin Hnahthial District chanpual tur chu niminpiah khan Hnahthial thlenpui a ni a, Hnah-thial District Bawrhsap, H. Dolianbuaia chuan tun ang hun harsa leh khirhkhanah District Hospital Hnahthial-in Khawl tha leh man to tak tak pathum a nei thar chu lawmawm a tih thu sawiin, "Sawrkar laipui pawh COVID-19 hrileng vang hian an buai em em a, tharchhuah leh thawhchhuah neilo keini ang State tan phei chuan a buaithlak takzet a. Chutiang kara hmasawnna hmel thar hmuh hi a lawmawm hle a ni,” tiin bialtu MLA leh Health Minister ni bawk Dr. R. Lalthangliana hmalakna leh thawhrimna fakawm a tih thu a sawi bawk.


CHC tan Ambulance pe

Serlui bialtu MLA, Lalrinsanga Ralte chuan MLA Local Area Development Scheme hmanga Ambulance a lei chu nimin khan Vairengte CHC thawktute hnenah a hlan a, niminpiah khan Bil-khawthlir PHC-ah a lo hlan tawh bawk a ni. Ambulance hlanna hun ah Rubber & Allied Crops Development Board Vice Chairman ni bawk Lalrinsanga Ralte chuan Vairengte CHC chu Mizoram tan hmun pawimawh tak leh Mizoram hmel lanna pakhat a nih thu a sawi a, helai hmun thawmthat chu ramri venna kawng pawimawh tak a nih tel thu a sawi bawk. He hunah hian bialtu MLA hian Ambulance Chahbi hi Dr. Zorinsanga, Medical Officer hnenah a hlan a ni.


Ruahmanna siam tul ti

MPCC chuan hri leng avanga Total Lockdown kalpui mekah Aizawl leh District Capital dangah te ei tur nei mumal lo, harsatna nasa tak tawk mek chhungkua sang tam tak kan awm ta nia sawiin, heng mite chhawmdawlna atan hian sawrkar in rang taka ruahmanna a siam tul an tih thu an sawi.


BJP (MZ) in PM an chhuang

BJP Mizoram Pradesh chuan Prime Minister, Narendra Modi kaihhruaina hnuaiah PM Kisan Scheme kaltlanga huan leh lo neitu, mirethei te Account-ah pawisa thunsak a ni leh tur chu lawmawm an tih thu thuchhuah siamin an tarlang a, tun tumah hian PM-Kisan Scheme atan Sawrkar laipui chuan cheng vbc. 19000 ruahmanin, chhung-kua vbc. 9.5 te Account-ah thunsak a ni leh dawn tih an sawi a. Mizoram bikah pawh PM-Kisan Scheme-a in register, eichawp zawng leh lo-a hnathawk tam tak ten he hamthatna hi an dawng leh ngei dawn avangin he hamthatna duangtu Prime Minister chu an chhuang tih an sawi bawk.


ASF avangin Mizoram-ah Vawk 3301 a thi tawh

Mizoram-a Vawk hri leng mek, African Swine Fever chuan ziaawm lam ala pan thei meuhlo a, nimin khan Mizoram hmun hrang hrang ah Vawk 149 zet thi lehin heng te nen hian he hri leng avanga Vawk thi chu 3301 an tlingtawh a ni. Nimin khan Zokhawthar-ah Vawk 10 zet thi lehi Lunglei District-a Tuichawng khua ah Vawk thi pakhat a awm leh bawk a, Mizoram hmun hrang hranga chhan la hriat loha Vawk thi pawh 142 an tling tawh bawk a ni.

Comments

Chhiar Hlawhte