Latest News

EF&CC Department hnathawh thlirletna nei

Environment, Forests & Climate Change Department changtu Minister, TJ. Lalnuntluanga hovin nimin khan kum 2020-21 chhunga an Department hmalakna te thlirletna leh kum kal meka hmalak dan tur hrang hrang sawihona neih a ni.

Video Conferencing hmanga he sawihona hunah hian Meeting kaihruaitu Forest Minister, TJ. Lalnuntluanga chuan COVID-19 hri leng karah ramngaw humhalh a pawimawh zual zel tih sawiin, ramngaw leh nungcha pawimawhna chu a takin khawvel leh Mizoram ngei pawhin kan tawng chho mek a ni, a ti a. Thing phun chu hunbi nei a nih avangin kumin Fur ruahtui tlak laia a tam thei ang ber phun a nih theih nan hmalak a tul thu sawiin, ramngaw leh nungcha humhalh chu hrileng avanga inthlahdul theih a ni lo tih a sawi.

Thingtiak lian tha chauh kumin Green Mizoram Day-ah chuan phun a nih tur thu a sawiin Minister chuan, COVID-19 hri leng mek avanga Lockdown kalpui laiin ramhnuaiah mihring kan chevel nasa a, lo neih leh kut hnathawka eizawngtute chu ramngaw tha suat lo tur leh, nungch ate laka zahngai turin a sawm bawk.

He Meeting-ah hian Green Mizoram Day-a thingtiak sem chhuah dan tur leh, a enkawl zui dan tur te, Centrally Sponsor Scheme hnuaia project kal mek te thlirhovin, hmachhawp hrang hrangte an sawiho a ni bawk. He Meeting-ah hian Minister chuan EF&CC Department lehkhabu buatsaih, Mizoram-a National Park leh Wildlife Sanctuary te chanchin leh thlalak pholanna, ‘Splendid Wildlife habitats of Mizoram’ tih chu a tlangzarh nghal bawk.

Comments

Popular News (Last 30 Days)