Health Minister in State Cancer Hospital-a Cencer hemna khawl bun mek a tlawh

Health & Family Welfare Department Minister, Dr. R. Lalthangliana chuan nimin khan Mizoram State Cancer Institute, Zemabawk-a Cancer hemna khawl bun mekte a tlawh a. Zemabawk-a Central Medical Store tlawh nghalin COVID-19 hripui dona kawngah sawrkar chuan theihtawpin tan a la tih a sawi bawk.

Mizoram State Cancer Institute tlawhtu Health Minister hian Cancer Hospital bula Tertiary Care Cancer Centre (Cancer hemna khawlpui) tlawh hmasain hmalak dan a enfiah a, Tertiary Care Cancer Centre-ah hian Cancer hemna khawl lian LINAC (Model TrueBeam svc with FFF) cheng vbc. 17 man, Varian Medical Systems, USA kutchhuak leh khawl dang pakhat Brachy Therapy Machine bun a ni a. Khawl lian hi LINAC khawl ang chi ah chuan 2016 Model a ni a, a chhuak thar ber (latest model) a ni. He khawl hian X-Ray Energy 5 leh Electron Energy 6 a nei a, Cancer khawl hmasa in a hem theih loh, damlo tam tak phai lama referred thin ang kha a a je, theih tawh dawn tih he khawl buaipuitu Doctor te chuan an sawi a. Heng khawlte hi April thla khan bun fel vek tawh niin, kV Imaging QA, ni khat hna Radiological Precision Labs (India) Pvt. Ltd. Mumbai in an rawn tih zawh veleh hman phal dilna (license process) kalpui nghal tur a ni a, anni hi COVID-19 hri leng vanga an rawn kal theih rihloh avangin tum aiin an muang ta deuh tih Doctor hian an sawi a ni.

Health Minister chuan Cancer Hospital-a Cancer hemna khawl dang, Cobalt-60 dahna tur hmun pawh a tlawh nghal a, khawl bunna tur hmun hi peihfel vek tawh niin, a rawn bun turin khawl siamtu company Engineer te COVID-19 hri leng vanga an rawn kal theih loh avangin hma lak belh theih a nih rih loh thu an lo sawi a, Cobalt-60 khawl hlui chu kum 20 chuanga upa a nih thu leh a hman theih tawh loh avanga Cancer hem ngaite pawh an hem theih rih loh thu an sawi a. Khawl thar hi Cobalt-60 zingah chuan a chhuak thar ber (latest version) niin cheng vbc. 11 man a ni a. Heng Cancer hemna khawl rawn endik tur leh rawn bun turte hi a rang thei ang bera an rawn kal a tul tih Health Minister chuan sawiin, ZMC Oxygen Generating Plant din tura Company mithiamte a koh luh tawh thu a sawi a, heng company hotute chu rang taka rawn in tir turin amah pawhin a lo nawr chhunzawm tur thu a sawi bawk.

Health Minister hian Zemabawk-a Central Medical Store tlawh nghalin, hripui leng dona atana damdawi leh hmanraw hrang hrang dinhmun a enfiah nghal a, hmanraw chi hrang hrang dawn zingah Oxygen Concentrator 670 awmin heng te hi Ireland, Switzerland, China, Qatar, Vietnam, Taiwan, WHO leh MoHFW atanga dawn a ni.

Health Minister chuan tun dinhmunah CO-VID-19 dona atana kan hmanraw mamawh ang te chu a tam zawk chu kan phang rihlo tih sawiin, kan mamawh zual pawimawhte pawh neih belh turin theihtawpin hma an lak thu a sawi.

COVID-19 hripui dona kawngah sawrkar chuan theihtawpin tan a la tih sawiin, Zoram Medical College-ah First wave lai khan Khum 150 dah a nih thu leh Second Wave a rawn thawk dawn tih mithiamten an sawi avangin theihtawpin an inbuatsaih tih a sawi a, Medical Operational Team ten an Vice-Chairman Dr. ZR Thiamsanga hovin ZMC hotute nen ruahmanna an lo siam lawk thlap chu lawmawm a tih thu sawiin, Second wave atan hian ZMC chu khum 246 awm thei turin an buatsaih a, tunah hian khum 66 awm theihna Ward thar buatsaih lehin, hman theih a nih veleh khum 312 kan nei thei dawn a, he ward tharah hian damlote hman turin khum zawng zawng hi oxygen pipe hmanga thlun zawm vek an ni, a ti a. ICU pawh khum 13 an ruahman belh a, tunah hian ICU 34 kan nei tawh tih a sawi bawk.