Serchhip Bial-a bye-election neih turah MNF Candidate atan Vanlalzawma ruat a ni

MNF party chuan Serchhip bial-a MLA bye-election neih turah an Party Candidate atan an Party Vice  President, Vanlalzawma chu ruat a ni tih an puang a, heti hian Serchhip bial-a Assembly bye-election neih turah hian Candidate tur pathum chu an chiang tawh a ni.

Kum 2018 MLA inthlanpui-a Serchhip bialtu MLA atana thlantlin Lalduhoma chu Dan bawhchhia a puh a nih hnuah Serchhip bial chu nikum Nov. 27-a bial ruak-ah puan a nih avangin thla ruk (6) chhungin bye-election neih a ngai dawn a, hemi atan hian Party hrang hrangte chu inbuatsaih mekin rorellai MNF Party chuan Nomination Committee dinin tun thla tir lama thutkhawm an neih hnuah nimin khan an Chairman leh an Party President ni bawk, Zoramthanga hovin a Office-ah an thukhawm leh a, he hunah hian an President, Zoramthanga chuan Serchhip bial-a bye-election neih turah hian an Party chuan Nomination Committee dinin uluk taka an ngaihtuah hnuah an Party Vice President tanglai, Vanlalzawma chu MNF Candidate atan lungrual taka tha an tih thu leh ruat a nih thu a puang a ni.

MNF Vice President, Lalthlengliana chuan Bye-Election lo awm tur atana Party Candidate turah hming engemaw zat a lan chungchang zawhna chhangin, “MLA a ni emaw, AMC a ni emaw, MP inthlanah pawh hian hming pakhat chauh hi a lang ngai lo a. Keini hming te pawh nasa takin a lang a; chu'ng zingah chuan Nomination Committee chuan uluk takin a thlir a, midang an tha lo e tihna ni loin, tun tumah hian Vanlalzawmna hi i din tir ang kan ti ta a ni,” a ti.

Heti hian Serchhip bial-a bye-election neih turah hian Party pathum te chuan an Candidate tur an tifel ta niin a lang a, Zoram Peoples’ Movement (ZPM) chuan Serchhip bial-a bye-election neih turah hian MLA atanga ban tak Lalduhoma chu an dintir tur thu an lo puang tawh a, eptu Party, Indian National Congress (INC) chuan an Candidate tur hi la puang chiahlo mah se PC. Laltlansanga chu ding turin an tifel tawh a. Congress Lagislature Party (CLP) Leader Zodintluanga Ralte chuan, “Keini chuan Serchhip khaw pa ngei kan nei a. Tunah pawh campaign beihpui a thlak mek a. Official-a programme buatsaiha puan chiah chu awm lo mah se, kan ti chiang tawh a ni,” a ti bawk.