Latest News

Serchhip-ah Bawrhsap hovin Fire Prevention Week hawnna inkhawm neih a ni

Kangmei laka fimkhur a pawimawh zia inzirtirna Hapta, ‘Fire Prevention Week-2021’ chu nimin khan Serchhip-ah hawnna neih niin District Bawrhsap, Kumar Abhishek chuan khuallian niin a hawng a ni.

‘Fire Prevention Week-2021’ hawnna puala inkhawm Serchhip DC’s Conference Hall-a neih ah hian District Bawrhsap leh District Fire Prevention Committee-a Chairman, Kumar Abhishek chuan mihring nunna atana pawimawh ber boruak thianghlim kan hmuhna hnar ber ramngaw te chu humhalh a pawimawh thu sawiin, boruak thianghlim mai bakah sik leh sa siamtu pawimawh tak anih thu leh anih dan tur ang taka siamtu anih avangin ram kang tur venthat a pawimawh thu a sawi a. Ramkang chuan mihring leh nungchate tana boruak thalo siamin kan nunna atan a thatloh mai bakah ramsa te chenna tur a tihchhiat tel thin avangin kangmei laka inven a pawimawh hle tih a sawi a, kan ei leh bar zawnna kawngah pawh ramngaw ti chhelo zawnga Lo neih kan zir a ngai tawh tih a sawi bawk.

District Bawrhsap chuan kangmei chhuak thei laka invenna kawngah Department mal chauha hmalak a harsat avangin Department zawng zawngte tanrual a pawimawh thu sawiin, tlawmngai pawl hrang hrang te pawh tha thara tan la thar leh theuh turin a chah a. Ramkang laka inven chu kan hmalam huna kan tu leh fate tan a pawimawh deuh deuh tih pawh sawiin, mipui mimir ah nasa lehzual a inzirtirna pek a pawimawh thu leh Fire Prevention Week hman chhunga Department ten hmachhawp hrang hrang an neihte tha tak leh tluang taka an tih hlawhtlin theihnan duhsakna a hlan bawk.

Serchhip District-a Fire Prevention Week hawnna puala inkhawm hi Serchhip District Honorary Wildlife Warden, RL. Chhuanawma chuan kaihruaiin District Fire Prevention Committee-a Member Secretary leh DFO Thenzawl, Margaret Lalramchhani chuan report a pe a, Report-a tarlan a nih danin kum kalta chhung khan Serchhip District chhungah kangmei chhuak hmun 119-ah a awm a, heng zinga 95 te chu Lo hal avanga kangmei chhuak niin, hmun 25-ah mimal ram kang a awm a, kum kalta November thla atanga Vawiin thleng khan hmun 19 ah kangmei chhuak awm tawhin Hectares 52.6 a zau ram a kangchhia a ni.

Nimin-a he hun hmanna a tel te hian DFO North Vanlaiphai, Jenny Sailo kaihhruaina hnuaiah kangmei tichhuaklo tura intiamna thuchham an chhamrual bawk a ni.

Comments

Chhiar Hlawhte