RIDF chungchang zirhona Kolasib-ah neih a ni

National Bank for Agriculture and Rural Development (NAB-ARD) Mizoram buatsaihin nimin khan Kolasib-ah District Level Sensitization on Rural Infrastructure Development Fund chu neih a ni.

    Kolasib DC Conference Hall-a he hun hman hi Kolasib DC, Dr. H. Lalthlangliana chuan hmanpuiin RIDF chungchanga NABARD Mizoram in zirtirna an buatsaih chu lawmawm a tih thu sawiin, Sawrkar hnuaia Department hrang hrang awmte tih hmasawn chu a thawktute taimakna ah a innghat thui hle tih a sawi a, an remhriatna leh thiamna te hmang tangkai a RIDF leh sum lu dangte pawh Mizoram mipuiten an chhawr tangkai theih nan ngaihtuahna seng tam turin kalkhawmte a chah bawk.

RIDF hi thingtlang leh kuthnathawka eizawngte tih hmasawnna tur atan a duan niin hemi hnuaiah hian mipui mamawh dan a zirin fund pekchhuah pawh hi thuang thum a then a ni a. Agriculture leh a kaihhnawih hnuaia fund te hi RIDF hnuaiah zaa 95 tum sakin zaa 5 chu State sawrkar in a tum a ngai a, Social Sector hnuaiah zaa 85, hmarchhak State tan zaa 90 tum sakin Rural Connectivity, thingtlang-a inkalpawhna kawnga hmalaknaah zaa 80, hmarchhak State tan zaa 90 a tum sak thin a ni. RIDF hi kum 1995-96 atanga kalpui tan niin hmalakna hlawm 37-a then hnuaiah hna kalpui thin a ni a. Mizoram chhungah hian February 15, 2021 thleng khan RIDF atanga sum hmuh cheng vbc. 1406.35 hmangin project 522 kalpui tawh a ni a. Kolasib District-ah hian District Veterinary Hospital sak nan te, School sak nan te leh PHC sakna atan bakah kawng laihna leh Lei dawhna atan te pawh hman a ni tawh bawk a ni.