Police ten Vaihlo leh a kaihhnawih an zirho

Nimin khan Serchhip-a Police Officer te tan Vaihlo leh a kaihhnawih leh Dan hnuaia khuah-khirhna hrang hrangte zirhona neih a ni.

National Tobacco Control Programme (NTCP) Serchhip District buatsaiha he zirhona Serchhip SP Conference Hall-a neih hi Serchhip SP mawh-phurhna la mektu Addl. SP, PC. Laltanpuia chuan hmanpuiin Police Department ten CMO Office leh damdawi In lama thawktute nen thawh-hona tha tak an nei chu lawmawm a tih thu a sawi a, thawhhona tha tak an neih zel a beisei thu a sawi bawk.

Serchhip CMO Office-a Head Assistant, C. Vanlalauva kaihhruai he hunah hian NTCP-a District Consultant, K. Hmingthansangi chuan GATS leh COTPA 2003 chungchangah zirtirna pein Caroline Rinzampuii, Asst. Drug Inspector chuan Food Safety and Standards Authority (FSSA) chungchangah zirtirna a pe a. Maria VL Neihhlui, Counsellor NTCP in Vaihlo leh a kaihhnawih nghei dan chungchangah zirtirna pe in Legal Metrology-a Inspector, Johny Zonun-mawia chuan Legal Metrology Act leh Dan lova bungrua lakluh chungchangah zirtirna a pe bawk a ni. He hunah hian Serchhip bakah Thenzawl leh North Vanlaiphai atangin Police Officer te an tel a ni.